Thaw ain ban khang bar jylla, ong U MDC Sohra

Shillong,30 Risaw:
Haba wanrah ia ka jingiakren, ha Ing Dorbar mynta ka sngi, u MDC ka Sohra u Bah Titos Chyne, u la pynpaw ia ka jingsngewkhia halor ki jingshah kynnoh bad ki jingshahkynthoh ka district Council bad ki Rangbah, kiba kitei ki jing kynnoh ki la mih na u Myntri Rangbah ka jylla u Dr.Mukul Sangma. Haba kren halor katei ka phang u Bah Titos u la ong ba na ka Sixth Schedule ki la don ki ain ba ka Council ka pyntreikam ban iada na ka jingwan tyllep ki briew kiba na bar ha Ri-Khasi kaba hapoh ka jingpeit jong ka KHADC.
U Bah Titos u la kdew ba ka jingsdang jong ka jingwan rung kyrthep ki briew kiba na bar ka dei nyngkong eh ba ki wan kum ki nongbylla sngi (Labourer) kiba wan ban trei da ki dor kiba tad, hynrei hadien pat tang kumba katto katne por ki la kylla long ki malik lyngba ka jingioh lad jong ki ban shongkha ia ki ‘thei Khasi. U la pyni nuksa ba katei ka jingjia ka la jia ha ki ba bun ki jaka khappud kum sha Majai bad kiwei. U la bynrap biang ruh ba ki sengbhalang ki pynlong jingiakhih ban dawa ba dei ban pyntreikam ia ka ILP, ka dei namar ba ki la iohi ia ka jingma kaba ap ia ka jaitbynriew lada ym leh eiei.
“Lada shah kynnoh ngi dei ban ieng rangbah ban thaw noh da ki ain ia ka jingwan rung kyrthep ki briew kiba na bar-Dei ban don da ka permit ha ki jaka ba la pyrkhing ka District Council ( Protected Area) ba ym bit ia ki briew kiba na bar ban rung sha ki jaka ka district council” ong u MDC ka Sohra uba la ioh ia ka jingkyrshah halor ki jingkren jong u na u Bah Embhah syiemlieh MDC Mawlai, kong Teilinia Thangkhiew MDC Mylliem, Adilbert Nongrum MDC Jaiaw.
Haba kren na ka liang ka EC halor katei ka mat, u CEM ka KHADC u Bah Pynshngain N Syiem u la ong ba ka KHADC ka la pynkhreh ban pyntreikam ia ka Village Administration Bill ha kaba u la ong ba kane kan iada shibun na ka jingwan tuid ki bar jylla. U la ong ba katei ka bill kan teh lakam ia ka jingwan rung ki briew kiba na bar sha kane ka jylla lyngba ka jingtrei kam jong ki Rangbah shnong, ki nongai wai ing bad ki nongshongwai, u la pynkynmaw ba haba ki bar jylla ki wan sha kane ka jylla nyngkong eh ki donkam ia ka jaka sah bad ban trei iaki kam jong ki ki donkam ka NOC na u Rangbah shnong, bad hangtei lah ban khanglad ia katei ka jingwan rung kyrthep ki mynder ong u CEM uba la ong ruh ba ia katei ka Bill yn sa phah ruh sha u Myntri Rangbah.