Thap biang ki nonglute, da kaba bret jaboh ia kiba khung pisa

Shillong, 7 Lber:
Ki nongtuh pisa ha Khyndailad ki la sdang biang ban pyndonkam da ka buit kaba rim kaba ki ju leh ha ki por mynshuwa kata ban kawang pynjaboh ia ki briew kiba mih na Bank bad hadien kata uwei na ki paralok jong ki un wan ban leh bha da kaba leit ban pynkhuid ia kita ki jaboh; katba kiwei pat ki u paralok jong u kin wan ban knieh ia ka pla pisa jong ki briew bad phet krad.Kaba kum katei ka jingjia ka la jia teng ha ki khyndiat snem myn shuwa ha Khyndailad, hynrei hadien ba ki pulit ki la ioh kem ia kiba bun na ki ka la jah noh bad mynta ki la sdang biang ban pyntreikam.
Ki pulit ka nongbah Shillong ki la ioh kem saw ngut kiba kum kitei ki briew bad kitei ki kynthup ia u Bikash Kumar, 20 snem na Kathiar, Bihar,u Amar Gowala, 25 snem na Jalpaiguri-West Bengal bad ar ngut ki khynnah rit, la kem ia ki na Khyn dailad, Shillong. Kitei ki dei ki briew kiba ap siar ia ki briew kiba rung ba mih hapoh Bank bad hadien ba ki la iohi ba ki briew ki sei pisa na bank ki ju buddien ia ki bad hadien kata uwei na ki un kawang da ki kynja ktieh ban pynjaboh ia u briew katba uwei pat un leit leh kumba iarap bad u paralok jong u pat un leit ban knieh ia ka pla pisa bad phet krad.
Ki pulit ki la ioh kem ia kitei hadien ba ki la ap siar bha mynta ka janmiet ha Khyndailad, kitei kibriew ki ap thap ia kipaidbah kiba rung ba mih ha State Bank of India, Evening Branch bad United Bank of India kiba don ha G.S Road, bad hadien ba la ioh kem ki pulit ki sa lap ba kitei ki briew ki dei kiba la ju leh ia kitei ki kam ha u snem 2014 bad 2015.