Thangiong ki nongkhaii dewiong, na ka rai ka NGT

Shillong,9 Jylliew:
Kiba bun bah ki nongkhaii dewiong bad ki trai par dewiong kiba la wan ban sngap ha ka hearing jong ka National Green Tribunal kaba la long mynta ka sngi ha Megha laya High Court, hynrei hadien ba la kut ka jing shong bishar, la iohi ba ki nongkhaii dewiong ki la kylla dur bad ki thangiong ngain halor katei ka rai ban khang syndon ia ka jingtih dewiong ha kane ka jylla.
Ka jingwan jong ki mynta ka sngi sha High Court, ka long ba ki kwah tip kaei ka rai ka ban mih, na katei jingbishar, kaba la long mynta ka sngi, watla la rai ban ailad ba kin die ia ki dewiong kiba la sei shabar, hynrei katei kam pynhun ia ki nongkhaii dewiong namarba ki hap pat ban die hapoh ka jingpeit jong ka komiti kaba kin sa thaw hapoh ka shi taiew. Katei ka rai ka la pynlong ia ki ban mih jlew slew na Kashari.
U nongthohkhubor, u la ioh ban ia kren bad katto katne ngut na ki, ki la don kiba pynpaw ba ki la sdang ia ka kam tih dewiong la slem bha , don kiba ong ba naduh ka por ka Indira Gandhi , don pat kiba ong ba ki la trei pateng na ki longshuwa jong ki katba ka ing jong ki pat ka dei kaba im na u dewiong.
La iohi ruh ba ki la don bun ki malik bar jylla, kiba dei ki nongkhaii dewiong kiba la wan ban sngap ia katei ka hearing,g uwei na ki bar jylla uba khaii dewiong sha Ri-Lum Garo u la iathuh ba u don bun tylli ki trok hynrei mynta u la shu hpynshongsngi lut ia ki, u la ong ba ym tang ki nongkhaii ne ki trai kiba mad jingeh halor katei ka rai hynrei ki nongniah trok ruh kim ioh kam shuh, ki dukam die sha die jar uh kim biang kamai shuh bad wat ki dukan die kwai ruh kim ioh kamai shuh , ha katei ka jaka ba u khaii dewiong namarba u la iathuh ba ka jingmih ba kongsan eh ha katei ka jaka ka dei lyngba u dewiong.
Sa kawei pat kaba la pynthangiong ia ki nongtih dewiong , halor ka jingtip ba ki la ioh lum ba watla la ailad ba kin die ia ki dewiong ba la sei shabar pynban ki hap pat ban ia soi ia ka jingiateh kular bad ka tnad ka ban pynneh pynsah mariang , ba kan ioh lang ia ka jingmih na u dewiong ba la die.