Thang mombati ka JNV,HYC; ia 3 ngut kiba iap ha along Jowai

Jowai, 17 Nailur:
Ka Jaintia Natio nal Volunteer (JNV) bad ka Hynniewtrep Youth Council (HYC)- Jaintia hills District Unit, ki la pynlong ia ka jingthang Mombati kum ka dak ban kynmaw burom bad ban pynpaw ruh ia ka jing sngewkhia halor ka jingduh ki lai tylli ki mynsiem ba kordor hapoh along ki pulit ha thanad Jowai.
Kitei ki lai ngut ki kynthup ia u Kitboklang Gassar na Mynthong bad u paralok jong u, u Daphahsalanmi Rupon na Salaroh kaba la jia ha ka 23 tarik u Nailar 2013 bad uwei pat u dei u Clefast Nongkhlaw uba la kynnoh ba u la sdien phasi hapoh katei ka phatok ki pulit ha ka 4 tarik une u bnai ba la dep.
Ka JNV bad ka HYC ki ar tylli ki seng bhalang ki la pynlong ia ka jingleh burom ia kitei ki lai ngut bad ha shwa ban thang ia ki Mombati, la ioh ruh ka jingkren na ki nongialam kitei ki ar seng bad ruh na kiba haiing hasem jong kitei kiba la duh noh ia ka jingim ba kordor jong ki.
U dkhot ka HYC, u samla Stephan Gashnga haba kren ha katei ka jingialang lyngkot u la ong ba ka thanad lane ka along ki pulit ka dei ka jaka ban ai jingsneng ia kiba leh ia kino kino ki kam ba bakla ym dei ka jaka ban phasi lane ban shah pyniap.
“U briew tang uba bakla suda haba ki pulit ki kem ia u ka mut ba un ioh jingiada hashwa ban bishar ia u da ka iing bishar hynrei ban jia kum kine ki jingjia kiba sngewsih ka imlang ka sahlang kam lah ban pdiang satia”, la ong u Gashnga.
U ma Rikitto Nongtdu uba dei u nongialam ka JSU bad uba dei u dkhot ka JNV u la ong ba ka jingiap ki lai ngut hapoh phatok ka  long kaei kaei kaba ym lah satia ban pdiang bad ki jingjia kiba kum kine ka ktah ia ka imlang ka sahlang, ia ki kmie ki kpa, ki hynmen ki para bad ka pynlehrain wat ia ka District hi baroh kawei.
“Baroh u Pulit um dei u ksuid bad baroh ki riewniam kim dei ki Angel, kumta nga kyntu ia ki pulit ba kin long kum ki briew kiba tip ia ka jingkordor ka mynsiem briew”, la kynthoh u ma Nongtdu.
Ha kane ka sngi la ioh ruh ia ka jingkren na u ma Kolin Laloo, President barim ka JSU nalor kiwei kiwei kynthup ia kiba haiing hasem jong kitei kiba la duh noh ia ka jingim hapoh along.