Nongstoiñ: Kum shi bynta ban kynmaw burom ia i (L) Daritngen Syiem, I ba la shah pyniap dusmon ha u snem bala lah na ka liang jong ka Seng samla shnong Siejlieh(SSSS) ha ryngkat ka jingiatreilang bad ka HYC WKHD, myn hynnin ka sngi ka la ioh ban pynlong ia ka jingthang mombati ha ki ar tylli ki jaka kata ha Iew Nongstoin bad ha shnong Siejlieh.
Ha shwa ban sdang ka jingiathang mombati kaba long ha ki ar tylli ki jaka, na ka liang jong kitei ki ar tylli ki seng ha ryngkat ki ba ha iing ha sem jong katei ka samla lem bad ka jingiasnoh kti lang ruh da ka seng NRLTODA Siejlieh, ki nongialam ka Seng longkmie Nongstoin ha ryngkat ki draibar taksi, mynta ka janmiet, ki la ia mih paidbah na Siejlieh ha ryngkat ki jingdeng lama iong bad iaid ruh shaduh Iew Nongstoin bad la ioh ruh ban pynlong ia ka jingialang kaba lyngkot.
Hadien katei ka jingialang kaba lyngkot ha Iew Nongstoin, ki la leit beit noh sha shnong Siejlieh ban pynlong biang sa ia ka jingialang paidbah ha kaba la pyniaid ia katei ka jingialang da u samla D. Kharsyntiew Secretarey ka shnong Siejlieh, ha ryngkat ka jingiadon lang ki dkhot EC jong ka shnong, ki seng longkmie, ki association driver, ki nongialam ka HYC ki paidbah bad kiwei kiwei.
“Ban ioh ia ka jingbishar kaba hok halor ka jingshah pyniaip dusmon ka samla Daritngen na ka liang jong ngi ka seng HYC ngi dawa ba dei ban phah tohkit bniah noh ha ka CBI namar kumba ka paw mynta u runar u ba don kti ban pyniap dusmon ia katei ka samla u la lait noh mynta bad u la ioh ban iaid laitluid” ong u samla Kyrshan Marbaniang Vice President ka HYC WKHD.
Katba na ka liang jong u bah Davisgoldfield Wanniang u ba la ai jingkren na ka liang jong ka shnong u la ong ba ha kaba iadei bad ka jingphah tohkit CBI ka shnong kan nym ai ia kano kano ka jingkular lane ka rai, hynrei kan rah pat ia katei ka kam sha ka EC jong ka shnong bad ha kajuh ka por, u la ong ruh ba ia ki nongleh kam sniew dei ban pynshitom beit kakum ka ain la ka long ka ain shnong ka ain Hima ne ka ain sorkar.
Kiwei kiwei ki nongkren ha katei ka jingialang ki kynthup ia u samla Wanteibok Lyngdoh Secretary ka HYC WKHD, u samla Lumlang Kharsyiemlieh President ka HYC Nongstoiñ Circle, kong A.K. Syntiew seng longkmie jong ka Nongstoiñ bad kiwei kiwei bad hadien katei ka jingialang la pynbud pat sa ka jingiathang mombati ha ka shnong Siejlieh.