Thang ki thei Congress ia ka dur u myntri BJP, ba kren beiñ Sonia

Shillong, 03 Iaiong:
Ki longkmie Congress ka Meghalaya ha kane ka sngi Palei ki la thang ia ka dur jong u myntri sorkar pdeng ka BJP u Giriraj Singh namar ka jingkynthah jongu pyrshah ia ka president ka AICC ka Sonia Gandhi dang shen.
Ki dkhot jong ka Meghalaya Mahila Congress Workers (MMCW) ym tang ba kit hang ia ka dur jongu hynrei ki la dawa ba dei ban weng noh ia u na ka shuki myntri.
Lah ban kdew ba u MP ka  BJP na Bihar uba long myntri ha ka kynhun jong u Myntri rangbahduh ka ri u Narendra Modi, u Giriraj Singh uba la ong, hato ka Congress kan pdiang ne em ban long nongialam lada kam dei kaba lieh ne kan dei na Nigeria.
Kane ka jingkren jong utei u myntri ka la pynkhihwin ia ka party Congress kaba la pyrshah jur ia kane ka jingkren jongu bad dawa ba u dei ban shah pynhiar shuki noh. ”Lada u Rajiv Gandhi un shong kurim ia ka kynthei Nigerian  bad lada kam dei kaba lieh, hato ka Congress kan pdiang ba kan long nongialam ha ka party?.”
U Singh u dei u myntri khynnah ba peit ia ka tnad karkhana rit ha ka sorkar u Modi.
Ka President ka MPMC ka Ebel M. War ka la ong ba ka seng ka pynrem jur ia ka jingkren laplah u myntri ka BJP pyrshah ia ki kynthei.  Kane ka jingkren jongu ka pyni ba u dei uba khim jingmut. Ka Sonia Gandhi ka dei ka dak jong ka jingpynkupbor ia ki kynthei bad ka dei ka nuksa ia ki kynthei ha ka pyrthei baroh kawei. Ngi ia ia ka jingkyrshan ia ka nongialam jong ngi”, ka la ong haba pynlait khubor.
Ki thei ka Congress Meghalaya ki la dawa ruh ba u Myntri Rangbahduh u Modi u dei ban panmap ia ka jingkren laplah u myntri jongu bad u dei ban weng noh na ka shuki myntri ia u Singh.