Thang ka SHM, ka tyngshop u Bah Prestone, ban eh daw ki Khasi ha Block-2

Nongpoh:Ki nongialam ha ryngkat ki dkhot jong ki kynhun sengbhalang kiba don hapoh ka Shatri jong ka Save Hynniewtrep Mission, kiba kynthup ia ka CoRP, HANM, HYC bad ka JSM, mynta ka sngi ki la pyn long ia ka jingialang paidbah ha shnong Umroi, kata hadien ba ki la dep ban pynlong ia ka jingia iaid paidbah na Jing kieng Dwarksuid sha Umroi.

Hadien ba kut katei ka jingiaiaid paidbah, ki la pynlong ia ka jingialang paid bah ha Umroi bad haba ki la pynkut ia katei ka jingialang, ki sa thang ia ka tynshop u Bah Prestone Tynsong, kaba long kum ka dak ban pynpaw ia ka jingpyrshah jur, halor ka jingkren u Bah Prestone Tynsong, uba la kren shi kren ba baroh ki shnong kiba don ha Block-2 ki dei kiba la hap sha ka jylla Assam, hynrei ka Meghalaya ka hap ban iakren na ka bynta ban pynphai kylla ia kitei ki shnong ha ka jylla.

Lyngba katei ka jingialang, kitei ki nongialam ka Save Hynniewtrep Mission, ki la ioh ban kren bad ban pynshai paidbah ia ki 9 tylli ki mat jingdawa sha ka sorkar jylla, ba ka sorkar ka dei ban pynurlong ia kitei ki jingdawa.
Ki jingdawa jong ka Save Hynniewtrep Mission, ki kynthup ia ka jingdawa ban pyntreikam noh mardor ia ka ILP hapoh ka jylla, ban pynrung ia ka ktien Khasi ha ka khyrnit ba phra jong ka riti synshar, ban pynbeit biang ia ka soskular kaba beain hapdeng ka Meghayala bad Assam, ban pynkynriah noh ia baroh ki nongtrei sorkar bad ruh ia ki Khar metor kiba sah beain ha them Iew Mawlong, ban pynbeit thymmai bad pynbha ia ka polisi thungkam ba noh shilliang ha Meghalaya, ban tohkit da ka CBI lane da ka iing Kashari ia baroh ki kam bamsap ha ka jylla, ban tohkit da ka CBI, bishar da ka Iing Kashari ba iaid stet bad pynshitom ia ki pulit ba leit siat iap ia u (L) Bah Cheristerfield Thangkhiew, ban thungkam noh mordor da ka lynti bakhuid ia baroh ki kam basah thylli ha ka jylla bad ban weng mardor ia ka Ain ‘Khalai’ ne kaba la tip kum ka Casino.

Ki heh nongialam jong ki sengbhalang happoh ka shatri jong ka Save Hynniewtrep Movement, ki Bah Robertjune Kharjahrin, President ba rangbah ka HYC, nangta u Bah Bandary Ryntathiang, President ka CoRP, u Bah Roykupar Synrem, General Secretary ka HYC lem bad kiwei, ha kaba lyngba jong katei ka sngi ki la ioh ban pynshai sha ki paidbah halor kitei ki mat jingdawa kaba ki la buh sha ka sorkar jylla.