Thang dur Modi ki kynthei Congress

Shillong, 26 Jymmang:
Ki kynthei ka Congress ki la thang ia ka dur jong u Myntri Rangbah duh ka ri u Narendra Modi ban pynpaw pyrshah ia ka jingkiew ki kam sniew pyrshah ia ki kynthei ha ka ri bad ka jingbym lah kane ka sorkar ban tem ia ki. Ia ka dur jong u Modi la thang da ki kynthei Congress ki dkhot ka Meghalaya Pradesh Mahila Congress (MPMC) hakhmat ka ophis ka Congress Bhavan  ha kane ka sngi Hatmajai.
“Wat hadien shi snem ba la don ha ka sorkar NDA, ba ialam da u Narendra Modi  kam shym la lah ban tem ia ki kam sniew ia ki kynthei ha ka ri khamtam ha Dong Mihngi”, la ong president ka MPMC ka Kong Joplin Shylla.
Ka la ong ba ki kynthei na kane ka thain dong Mihngi ki la dei ki langknia ban shah thombor bad ka sorkar pdeng pat kam shym la leh eiei ban tem ia kane bad ban pynshitom ia ki runar.
“Nga sngew ba kane ka sorkar kam shim khia bad ka jingthang ia ka dur jong u Modi ka long ban pyni ia ka jingpyrshah ia ka jingbym leh eiei ka sorkar halor ki jingeh jong ki kynthei”, la ong ka Kong Shylla.