Thalaiñ U Mukul ia ka jingkren ka UDP

Shillong: U myntri rangbah barim ka jylla uba long mynta u nongialam ka Liangpyrshah u Dr.Mukul Sangma u la thalaiñ kylla halor ka jingkynnoh ka UDP ba ka dei ka Congress kaba la wanrah nyngkong ia ka CAB ban pynlong nong India ki Hindu kiba shong bsah ha Pakistan. U Dr.Mukul u la ong “Nga lyngngoh ba ka UDP bad kiwei pat ki Party kiba ia kdup bad ka nongiasylla ka BJP, ba ki kam ban pynbiej ia u paidbah ba dei ma ki, ki Messaiah na ka bynta ban iada ia ki rit paid na ka CAB, dei ba ki la sha hhikai ha ka BJP ban kren kumtei” ong u Dr.Mukul.
Ha ka jingthoh kaba la phah sha ki nongthohkhubor u Dr.Mukul u la buh ruh bun ki jingkylli halor ka CAB ha kaba u la ong hato ym dei ka BJP bad ki paralok jong ka ba kynthup ia u Conrad K Sangma kiba la wanrah ia ka CAB ha Lok Sabha?, Hato kam dei ka jingshisha ba ki Party kiba don hapoh ka NEDa ki la lum jingialang ha ka 19 tarik u naitung, 2016 ban kren ia katei ka bynta?, Hato kam dei ka jingshisha ba ka BJP ia ka dei paralok bad ka NPP ban pyntlot bor ia ka Congress?, Hato kam dei ka jingshisha ba ka UDP ka kyndit ia kane dei tad hadien ba ki briew ka dong Mihngi ki ia khih paidbah ha surok?, Hato ka BJP kam mut ban mynjur jubor ia ka Cab ha Rajya Sabha?, Hato kam dei ba ka UDP bad NPP ki dang ia kdup sah bad ka BJP haduh mynta ruh?, ong u Dr.Mukul uba buh bun ki jingkylli.
U Dr.Mukul u la ong ba ka seng Congress ha ka mat treikam elekshon jong ka ha ka MP ka la buh hakhmat eh ban pyrshah ia ka CAB bad u dei ma u mynta uba ialam ia ka komiti ban pyrshah ia kino kino ki ain kiba long pyrshah ia ki rit paid ka thain shatei Lam Mihngi. U la ong ruh ba lashai ka sngi ka 25 tarik u rymphang u President jong ka seng Congress u Rahul Gandhi un wan ban kren paidbah ha Guwahati, ong u Dr.Mukul uba bat mynta kumu Chairman ka North East Congress Co-Ordination Committee ( NECCC).