Thalain u heh Congress, ba pynduh tulop ia ki nongtrei JHADC

Jowai: U MDC ka liang pyrshah ha JHADC u ma Awhoi Andrew Shullai u MDC ka Congress u la kynthoh jur ia ka sorkar ka ba ialam da NPP bad u Conrad Sangma kum u Chief Minister bad u Thombor Shiwat kum u CEM ka JHADC namar ba kine ki heh sorkar kim lah ban siew tulop ia ki nongtrei jong ka District Council la phra bnai mynta.

“Nga dap da ka jinglyngngoh ba khraw ba ka EC hapoh ka jingialam u ma Thom bad ka sorkar hapoh ka jingialam u Conrad Sangma kam lah satia ban siew ia ka tulop jong ki nongtrei. I mat kane ka sorkar ka kwah ban pynduh pyndam noh ia ki District Council wat lada la pynkupbor da ka riti synshar ka ri ba kin ieng rasong ban iada ia ka hok ka kynti ki rit paid bad ki riewlum”, la ong u ma Shullai.
Ka JHADC kum ba long mynta ka don hapdeng ka jingeh ba khraw bah namar ba kam don pisa shuh ban siew tulop ia ki nongtrei jong ka. Ki nongtrei jong ka hapoh ka lama jong ka JHADC Staff Employee Association ki la hap ban shim ia ka rai ban pynlong da ka indefinite strike ka ba dang iaid haduh mynta ka sngi.
“U ma Andrew Shullai u la ong imat ba ka ne ka sorkar jong u Conrad Sangma u kwah shisha ban pynduh pyndam ia ka District Council. Ka bhah jong ka JHADC ka ba ka dei ban ioh la shu pynjah rngai ia ka. Balei?,” la buh jing kylli u tei u nong ialam ka liang pyrshah.
Ha kine ki khyndiat sngi na ka liang u EM In charge ia ka Taxation Department u ma Wining Garland Sungoh u la lum jingialang ia ki heh jong ki karkhana dewbilat ban kyrpad ia ki ba kin siew noh ia ka professional tax khnang ba kan long ka jing iarap ia ka Council hynrei ki nongtrei ka Council ki strike bad ki ophis ki la khang.
“ Hangno kin siew ha ba ka ophis ka khang”, la kylli u ma Andrew Shullai.
Ha ba ia kren bad u ma Thombor Shiwat u CEM ka JHADC u la iathuh ba kat kum ka jingkhein ka JHADC ka dang dei ban ioh haduh 93 klur hynrei na ka liang ka sorkar kam pat don jingkhein ei ei halor kane na ka ta ka daw imat kam shym la pyllait ia kane ka pisa la ong u ma Thom.
Mynta ka sngi u CEM u la lum jingialang ruh ia ki heh nongialam jong ki nongtrei jong ka JHADC bad hadien ba u la kyrpad ia ki ba kin weng noh ia ka strike jong ki, ki la rai ban weng noh wat lada na ka liang u CEM um la ban pyn thikna ha ka ba iadei bad ka jingsiew ia ka tulop jongki.