Shillong:Hadien ba u Bah Prestone Tynsong u ba dei u Symbud Myntri Rangbah ka jylla u la ong ia u Bah Adelbert Nongrum u ba dei u MLA ka seng KHNAM na North Shillong Constituency ba um dei satia ban pynlong drama saiñ pyrthei ia ki ishu ba ka sorkar kam lah ban leh hak dak namar ba u Bah Adelbert Nongrum, u la leit shong kyllaiñ mongor ha Madan Malki kumba san sngi kynthih kaba la sdang naduh ka 17 tarik u bnai Kyllalyngkot 2022 ka ban kut haduh ka 22 tarik u bnai Kyllalyngkot 2022 ban pyrshah halor ka jingbym shim khia jong ka sorkar jylla ia ki katto katne ki mat jingdawa kiba hakhmat tam, na ka liang u Bah Adelebert u la thalaiñ tyngeh ia u Bah Prestone Tynsong da kaba u la ong, “Bah Prestone, sngewbha long rangbah namar phi la don ha kawei ka party mynshwa kaba la don ha kti ia ka ILP bad mynta pat phi don sha kawei ka party kaba phi dang pan pat ia kata ka ILP. Te nga kwah ban ong tang kane kawei nai pynlut kai ia ka por ban ialam bakla ia u paidbah namar nga kwah ban phla ha kane ka por ba ngam hun ban shah ialam bad ngam kwah hi ruh ba ki paidbah ruh kin long kita kiba shah ialam. Mynta ka dei ka jingdawa ban khot ban mih ym kum ki nongbud hynrei kum ki nongialam”. U Bah Adelbert Nongrum u la ong ba kaei kaba u kwah ba ki paidbah ki dei ban sngewthuh ka long ka nongrim kaba u ieng bad lada ki paidbah kim sngewthuh ia kata kam don jingmut ba kin ai ka jingkyrshan ia u.
Shuh shuh u Bah Adelbert ula ong, “Nga kwah ban pynkynmaw ha kito ki por ba phi ong ba nga leh drama hynrei nga la buh ka jingkylli ba kaei kaba jia ia u Bah Cheristerfield. Ngan iai pynim ia kane ka case bad lada u Blei u isynei ia kaba ngan don ha ka bor, ngan hap ban khyllie bad hap ban pynngat ia ki briew kiba don ha kata ka bynta ban ai ia kata ka rai kaba bakla ha kaba u DGP u la pynpaw da kumwei, u CM u pynpaw da kumwei, u Home Minister u la pynpaw da kumwei, haba ki ong ba ki phah leit ban kem hynrei ha ka por ba ki leit pat ki leit pynban ban siat, haba kumne mano ba leh political drama?”.
U Bah Adelbert u la nang thalaiñ tyngeh shuh shuh da kaba u la buh jingkylli ba dang shen hashwa ka ar sngi ne lai sngi ka elekshon MLA shiteng samoi kaba la long dang shen ha ki laitylli ki konstitwensi ha kaba ka sorkar jylla ka la ong ba ka jingpynkynriah ia ki kharmetor ka la biang lut nadong shadong hynrei haba peit mynta pat kata ka jingpynkynriah ka dang sahteng sah bad u la ong ba katei ka jaka kaba sah ki kharmetor ka dei ka konstitwensi kaba ma u hi ula mihkhmat hynrei kim nud satia ban buh lem ia u kum u dkhot ka Committee bad ka daw lehse ba don kaei kaei sha lyndet hynrei na ka liang u Bah Adelbert u la ong un iai ap ia ka por bad u paidbah hi un sa bishar. Ha kaba iadei bad u pud u sam u Bah Adelbert u la ong ba ka sorkar jylla hi ka la ong ba ha ka 15 tarik u Kyllalyngkot 2022 kan dei ka sngi ba yn shim ia ka rai kaba khadduh hynrei ia kata ruh la rah biang sha kawei ka sngi bad u Bah Adelbert u la ong,” Haba kumne mano ba leh political drama?”
U Bah Adelbert u la ong ba kaei kaba u la dawa kam dei na ka bynta ka jingkwah ka jong u hynrei u la dawa ia kaei kaba la don lypa ha ka kti bad kam dei satia kaba hap ban da ap ban leh isynei bad leit khrong ne ban leit pan jingiarap nano re nano ruh. U la ong ruh lada ka sorkar jylla kam lah ban weng ia ka jingeh ha kaba iadei bad u pud u sam, ka dei pat ban leh eiei ha ban buh da ki lad jingiada bad ban buh noh ia ki police outpost ha ki jaka khappud khnang ba ki pulit ka jylla kin nym lah ban shu leh donbor tang hapoh sor hynrei ki dei ban pyni ia ka bor jong ki sha khappud bad u la ong lada ka sorkar kam lah ban leh ia kita ka dei ban ai noh ia ka shuki Myntri ki kam pohiing ka jylla ha u ba un ioh ban pyni ia kaei ka bynta kaba u don ia kata ka mynsiem bad ka jingshlur. U Bah Adelbert u la ong ruh ba ngi donkam ia ka tnad pulit ka jylla, ka sorkar jylla bad ia u Myntri ka tnad kam pohïing ka jylla ba kin long kiba shlur bad ba kin long kiba eh bad lada kim lah ban leh ia kata ki dei ban ai noh ka shuki Myntri kam pohiing ha u.
Kadei kaba Ong I bah adelbert