Tep don burom ka sorkar, ia u Bah Ripple Kyndiah

Shillong, 29 Lber:  
Ia ka met jong u Myntri sorkar pdeng barim u Bah Paty Ripple Kyndiah, la tep don burom mynta ka sngi hadien ba la pynlong ia ka jingkynmaw burom ha madan ka skul St. Anthony’s, ha Laitumkhrah shwa ban rah sha lum jingtep ka Balang All Saints’ Cathedral.
Ki paidbah na kylleng ki jaka kane ka jylla bad ki nongialam ka party Congress ki la wan ban burom khadduh ia u Bah Kyndiah uba la long uwei na ki nongialam bad ka jylla.
Ka sorkar jylla ka la pynlong ia ka jingleh burom ha kaba ki pulit ka la khublei ia une u rang bah kum ka jingai burom.
U nongialam ka Congress u Bah D. D. Lapang u la pynkynmaw ia ki kam ba khraw jong u Bah Kyndiah kum u briew uba don ka jingieid bad ka jingthmu bad ka  jingkut jingmut bad u la pynpaw ba ka jingkhlad noh jongu, kan long ka jingduh kaba khraw ia ka jylla bad ka ri.
Katba u Lamphang ka iing dorbar u AT Mondal u la khublei ia une u rangbah ha ka kyrteng ka iing dorbar thawain ka jylla. “U Bah Kyndiah um ju rem elekshon ha ka jingim jongu bad kane ka pyni ba ki paidbah ki shaniah ia u”,  la ong u Mondal bad bynrap ba u long u nongialam ia ki dkhot ka iing dorbar bad ia kiba thymmai ba kin long kiba tbit ha ka kam sain pyrthei.
Ka myntri kam pohiing ka jylla ka Kong Roshan Warjri ka la pynpaw ia ka jingduh kaba khraw ia ka jingkhlad u Bah Kyndiah.
U khun jong u Bah Kyndiah, u Bah L. K Kyndiah, u la ong ba ka iing ka sem ka la pynpaw ia ka jingsngew burom ia ka sorkar jylla kaba la leh burom ia kpa jong ki.
Na ka liang u Lat ka jylla u K N Tripathi la wan mihkhmat u Principal Secretary u M. S. Rao .
U Bah Kyndiah u la long u myntri sorkar jylla bad sorkar pdeng, u Lamphang ka iing dorbar thawain, bad u la thoh ruh ki kot kum ka “Jawaharlal Nehru: the Thinking Dynamo”, “Meghalaya: Yesterday bad ka Today, “Journey of Words”, “Rev. JJM Nichols Roy: Architect of District Council Autonomy” and “Mizo Freedom Fighters”.
Ha kane ka jingleh burom khadduh la wan ban buh syntiew da ki nongialam ka jylla, ki myntri sorkar, ki ophisar, ki ba haiing hasem bad kiba ieid ba thoiñ.