Shillong:U nongialam ka liangpyrshah uba dei ruh u MLA ka TMC na Songsak u Dr. Mukul M Sangma u la pynpaw ba teng teng ka pyntlot ia ki nongialam ban ieng ban iada ia ki dawbah jong ki trai shnong ka jylla, haba don ha ki National party.
Haba kren sha ki lad pathai khubor, u Dr. Mukul u la ong ba haba don ha ka party kaba heh na ka jylla kaba rit kum ka Meghalaya, kam long kaba suk ban pynngeit ban pynsngewthuh ia ki jingeh ki briew ha ki nongialam ha Delhi namar ba kim sngewthuh ia ki jingeh jong ki trai shnong ka jylla. U la ong ba kane ka dei ka jingshem ka jinglap jong u ha kine ki phew snem kum u nongialam paidbah.
“Teng teng ngi pyntlot ban iada ia ki trai jylla haba ngi leit iasoh sha ki national party, nga kren naduh ka mynsiem namar ba ka jinglong bun jaitbynriew ha ka ri, ka pyllong ia ki briew na Delhi ban ym sngewthuh ia ka jingeh ba shisha jong ki briew ha kane ka jylla. Ka long kaba eh ia ngi ban peit ia ki jingeh ba shisha jong ki briew ha kaba ki briew na Delhi kim sngewthuh. Nga shu ai nuksa ia ka jingpynkylla ia ka Riti synshar ka ri kaba la leh khlem ka jingtip kaba ki briew kiba shah ktah ha katei ka jingpynkylla. Haba phi don ha ka party kaba heh na ka jylla kaba rit, phi kwah ban pynshongnia hynrei phim lah ban leh bad kane ka dei ka jingshem jong nga”, la ong u Dr. Mukul.
Lah ban ong ba kane ka jingkren jong u Dr. Mukul ka pynshisha ba un ym leit biang sha ka Congress, kaba ula don baroh shi katta ki snem.
U Dr. Mukul lem bad kiwei ki la mih noh na ka seng Congress shwa ka elekshon 2023 ban leit iasoh sha ka TMC.
U la ong ba ki paidbah ki la mutdur shaei u Dr. Mukul un leit ne un leh hadien ba ula mih noh na ka Congress hynrei, u la ong, ba ka thong jong u ka long ban don bad ki paidbah bad kum u politishian un hap ban pyrkhat shwa ban jam shakhmat ia kaba bha bad kaba sniew. “Ka jingmutdur na ki paidbah ka la long ban pyrkhat ba ngan leit phai biang naduh ba nga mih na ka Congress. Ka jingthmu jong nga ka long beit tang kawei bad kata ka long ban don bad ki paidbah jong kane ka jylla kaba itynnad, ban noh synniang sha ki paidbah kum u nongmihkhmat. Kum u politishian ka donkam ban pyrkhat kaei kaban mih shwa ban iaid shakhmat. Ha kaba kut, ka shong ha u briew kampher ka party”, u la bynrap.
U Dr. Mukul u dei u MLA uba rim tam ha kane ka iing dorbar, uba la jop nyngkong ha u snem 1993 kum u MLA shimet shwa ba un leit iasoh sha ka Congress bad ula long u myntri rangbah naduh 2010 haduh 2017.
Phi don ban ong eiei?