Tem bom ki paidbah ha Mawphlang, pule kot ha Mawryngkneng bad Rajabala, brut ka Congress

Shillong: Ka seng Congress ka la brut ha kane ka elekshon shiteng samoi na ki lai tylli ki konstitwensi, ka seng Congress ka la duh ruh ia ki ar tylli ki konstitwensi kiba ka mihkhmat kata ka Mawryngkneng bad ka Rajabala konstitwensi bad ka National People’s Party ( NPP) ka la knieh noh ia kine ki ar tylli ki konstitwensi na ka seng Congress.

Ka bom ka la sawa jam ha Mawphlang konstitwensi ha kaba u kyrtong jong u bah Eugeneson Lyngdoh u la jop ha kane ka elekshon bad u la lah ban bat biang ia ka jaka u kpa jong u, u bah Syntar Klas Sunn. U Eugeneson u la ioh 12 904 Vote, u kyrtong ka Congress u bah Kennedy C Khyriem u la ioh 8678 vote bad u kyrtong ka NPP u bah Lamphrang Blah u la ioh 4980 vote. u bah Eugeneson u la tam ia u bah Kennedy da 4226 vote.

Ha Mawryngkneng konstitwensi kyrtong ka NPP, u la jop ha kane ka elekshon shiteng samoi bad u la ioh 14088 vote, u kyrtong ka Congress uba wan ba-ar u la ioh 12284 vote, ki kyrtong shimet u bah Norbeth Marboh uba wan ba lai u la ioh 1389 vote, u bah Esron Marwein uba wan ba saw u ioh 479 vote, u bah Arbiangkam Kharsohmat u la ioh 210 vote bad u NOTA pat u ioh 237 vote. U bah Pyniaid Sing Syiem u la tam ia u bah Highlander Kharmalki da 1804 Vote.

Ha Rajabala pat u kyrtong ka NPP u Abdus Saleh u la pynliem ia ka kyrtong ka Congress ka Hashina Yasmin Mondol da 1926 vote. U Abdus Saleh u la ioh 11823 vote, ka kyrtong ka Congress ka Hashina Yasmin Mondol kaba wan ba-ar ka la ioh 9897 vote , u kyrtong ka UDP u Ashahel D Shira uba wan balai u la ioh 7247 Vote, u kyrtong ka BJP u Kingstone B Marak u la ioh 333 Vote, kyrtong shimet Carla A Sangma 255 vote bad NOTA 174 vote.

Lah ban kdew ba hapoh ka 5 snem kata naduh u 2018 ka Congress ka la duh 4 tylli ki Seat , lai tylli dei kiba la khlad noh ki MLA bad kawei pat na ka jingrisaiñ noh jong u MLA . Ki lai tylli ki Seat kiba ka congress ka la duh noh namar ka jingkhlad jong ki MLA ia kaba la knieh noh da ka NPP ki dei ka Salsella , ka Mawryngkneng bad ka Rajabala katba ka Congress ka la duh noh ia ka Ranikor namar ka jingrisaiñ noh jong u M.M Dango bad ia kane ka Seat la knieh noh da ka UDP. Hapoh kane ka 5 snem ki la don 7 tylli ki elekshon shiteng samoi bad ha kitei ki elekshon ka NPP ka la ioh ban knieh 3 Seat katba ka UDP pat ka la ioh ban knieh 2 seat.

MAWPHLANG

EUGENSON LYNGDOH (UDP) ………………12904

KENNEDY C KHYRIEM ( CONGRESS)……8678

LAMPHRANG BLAH (NPP)…………………..4980

NOTA………………………………………………….198

MAWRYNGKNENG

PYNÏAID SING SYIEM (NPP)………………………14088

HIGHLANDER KHARMALKI (CONGRESS)……..12284

NORBETH MARBOH (IND)…………………………….1389

ESRON MARWEIÑ (IND)………………………………..479

ARBIANGKAM KHARSOHMAT (IND)……………..210

NOTA…………………………………………………………….237

RAJABALA

ABDUS SALEH (NPP)……………………………………. 11823

HASHINA YASMIN MONDOL ( CONGRESS)…….9897

ASHAHEL D SHIRA (UDP)……………………………..7247

KINGSTONE B MARAK (BJP)…………………………333

CARLA A SANGMA (IND)………………………………255

NOTA…………………………………………………………..174