Tang T.50hajar shah ia ki kyrtong ban rah pisa, lada palat yn knieh noh

Shillong,18 Naiwieng:
Ka tnad District Council Affairs ka sorkar jylla ka la pynmih mynta ka sngi ia ka hukum ba la sdang ban pyntreikam noh ia ka model Code of Conduct namar ka jingdon ka elekshon MDC shiteng samoi ha KHADC bad JHADC. La hukum ba baroh ki sengsaiñpyrthei bad ki kyrtong elekshon ba ki dei ban burom bad bud beit bud ryntih ia katei ka kyndon ba la pynbna.
Kawei na ki kyndon jong katei ka model code of conduct ka long ba u kyrtong u lah ban rah pisa kaba bun eh tang T.50 hajar tyngka bad lada lap ba u rah tam ia katei yn knieh lut ia ki pisa jong u.
Yn ym shah ban pyndonkam ki kyrtong ia ki kali jong u CEM, EM ne Chairman jong ka KHADC bad JHADC , lada lap ka dei ka jingpynkhein pynkhein ia ka kyndon elekshon.
Kat bym pat dei ka elekshon yn ym shah ban pyllait skhim MP, MLA ne kino kino ki skhim sorkar jylla ne sorkar pdeng, ym shah ban buh maw nongrim ia kano kano ka skhim thymmai, kumjuh ruh ka JHADC ne KHADC kam lah ban ai jingtrei thymmai ne ban ai skhim thymmai bad lada don kiba la don ki jingtrei ba la don bad kiba la sdang trei shuwa ban pynbna ia ka model code of conduct ki lah ban trei hynrei ki bym pat sdang hap ban sangeh shuwa lut.
La bthah ia ki Deputy Commissioner bad ki Returning Officer ba kin pynbeit ia ki kali , katno tylli ki kyrtong ki lah ban pyndonkam bad la pyrkhing ruh ban pyndon tynghung pynsawa khlem da ioh jingbit. Kitei ki kyndon kin treikan ha ki konstitwensi ba don ka elekshon shiteng samoi ym ha baroh ki district.