Shillong, 13 ’lyngkot:
Ka tnad ri jingri ka sorkar jylla ka dei kaba donkam bad kaba heh bha hynrei haba shim ia ka jingmang pisa ka sorkar, ka khein ba ka dei tang ka tnad kaba rit eh.
Ia kane ka jingkren la sei madan ym nangno pat, hynrei na u ophisar ba peit ia kane ka tnad hi, u Dr BK Mawthoh.
Haba kren mynta ka sngi, ha ka jingialang kut snem ba 20 jong ka Meghalaya Veterinary Services Association (MVSA) ha Shillong, u Dr Mawthoh uba long u Joint Director kane ka tnad, u la ong, “Ka tnad ri jingri ka dei ka ioh ia ka mang tyngka kaba rit eh na ka sorkar jylla watla, ka kam bad ka jingdonkam jongka, ka long kaba khraw”, la ong u Dr Mawthoh ha kane ka jingialang kaba la don lang ka myntri sorkar ka Kong Ampareen Lyngdoh.
U Dr Mawthoh u la bynrap biang, “ mynta u snem, ka sorkar jylla ka mang pisa tang T. 47 klur ia kane ka tnad, katba ka jingdonkam ka long kaba jur bha”.
U la ong ba ka jingdon jong ki pham ri sniang ri syiar, ka la long ka jingiarap ia kane ka tnad namar ba ka lah ban die ia ki jingri ban ioh pisa ban pynbiang ia ki jingdonkam kum ban thied kali, ban thied tiar bad kiwei. Katkum ka jingong u Dr Mawthoh, mynta u snem, ka pisa kaba la lang na kine ki pham, ka la kot sha ka shi klur tam eiei.
U la ong ba ka kam jongka tnad ri jingri ka sorkar, kam mut ba kan shu pynbun ia ki jingri jingdup hynrei kaba kongsan ka long ba kin peit ia ka jingkoit jingkhiah namar ba bun na ki jingpang kiba don ha u briew, ki wan na ki mrad.
“Kumba 70 percent ki jingpang kiba don ha u briew, ki dei ba wan na ki mrad”, la ong u Dr Mawthoh.
Hynrei kum u ophisar ba la kham rangbah, u la kyntu ruh ia ki nongtrei kane ka tnad ba kin tei ia ka jinglong kaba iajan bad ki nongrep ki nongri jingri, ban leh ban poi biang por namar ba ka kamram jongki ka long ban iarap ia ki paidbah. Shwa ia kane, haba kren plie ia kane ka jingialang, ka Kong Ampareen ka la ong ba ka kam ban long doktor mrad kam dei ka jingmon hynrei ka dei ka jingdawa jong ka kam.
Ka la ong ba ka kam ri jingri ka dei ka lad ioh kam ia ki briew bad ka la kdew ba ka prokram ka sorkar ka IBDLP ka dei kawei kaba trei ia kane ka bynta.
Ka ong ba ka sngew kmen ban ioh iakynduh ia ki doktor ba peit ia ki mrad ki mreng namar ka dei kaba ieid bha ia ki jingri. “Ha iing jong nga, ka long kum ka jaka ri mrad, nga don ki ksiew, ki miaw”, la ong ka Kong Ampareen. Ka MVSA ka don kumba 250 ngut ki dkhot ha ka jingiaid lynti jongka kaba ar phew snem naduh ba la seng ha u 1979. Ha kane ka sngi la ioh ruh ia ka jingkren na u Dr. K.B. Sahkhar u President ka MVSA, u Dr. C.J.K. Warjri u General Secretary.
Phi don ban ong eiei?