Tang shu peit na ka dur khmat, la ithuh ia ka jingpang

Shillong, 28 Risaw:
Mynhynnin ka sngi ngi la pynmih ka khubor shaphang ka bor ba phylla ba u samla Holei Binan na ka shnong Wahumlein, Pynursla u don ban sumar briew. Shuh shuh mynta ka sngi ngin bteng biang ia ka jing iakren kaba u Rupang u la ioh ban ia kren markhmat bad utei u samla.
Utei u samla u don ruh ia ka bor ba phylla ban ithuh ia ka jingpang kaba don ha ka met ki briew tang da kaba shu peit na ka dur khmat jong ki, kaba kham phylla ka long ba katba dang ia kren bad u nongthohkhubor utei u samla u batai kynsan ba u nongthohkhubor u don ia ka jingpang Gastric , “Phi don jingpang gastric, shim dih une u dawai, sa wan sha jaka ba nga sumar briew ngan ai dawai biang ia phi” u la ong, bad katei ka la pynlyngngoh ia u nongthohkhubor namarba shisha une u nongthoh u don ka jingpang Gastric, bad nangta u la ong ‘phi duna ki Vitamin’. Utei u samla ha ka jingiakren u la ong ba don ruh ki jait jingpang kiba rieh kiba um lah ban ithuh tang da kaba shu peit hynrei u hap ban tba na ki met jong ki nongpang bad tang kumta u la sngewthuh ia ka jingpang.
Nalor ki dawai kynbat utei u nongsumar ba khynnah ka rta uba dang 19 snem, u don ruh ka bor ba phylla kata ba haba u iohi ba ki tang ki kynbat ym lah ban pynkoit ia u briew u air uh da ki dawai phareng kiba u phah ia ki nongpang ban leit thied na Pharmacy bad u ai ia ki kyrteng dawai. Kaba phylla kaba paw hangne ka dei namar ba u dang dei u khynnah nongkyndong u bym da tip bha ban thoh ban tar, bad u ba la pep skul noh ha ka rta kaba rit u tip pat ia ka kyrteng ki jait dawai ba ia dei bad ka jingpang ki nongpang.
Haba la kylli kumno u tip ia ka kyrteng dawai utei u samla u la ong ba tang mar ia peit ia ka jingpang , ka la wan la ka wan hi ha ka jabieng jong u ia ka kyrteng ka dawai ba u dei ban phah dih ia u nongpang, bad u la shim ia ka slip ban thoh ia ki dawai bad ki nongpang ki leit ban thied na Pharmacy. Shuh shuh u la ong ba wat hadien ba la dep ba ai dawai ialade ruh u la klet noh kaei ka kyrteng dawai ba u la ai sha kito ki nongpang, hynrei haba ki nongpang ki leit sha pharmacy ban shim dawai ki ioh thik thik ia uta u kyrteng dawai ba u samla Holei u thoh.
Utei u samla wat ha ka rta kaba rit hynrei kum kiwei pat ki khynnah nongkyndong u im ha ka leit bri leit bsah, hynrei mynta u la kylla u nong sumar briew ha kaba um ju ioh por shuh ban leit bri namarba shisien saw sngi ha ka iew Pynrusla u hap ban wan ai dawai ia ki paidbah, bad lait nangta man ka sngi ki briew ki wan wad sha shnong jong u, bad bunsien u hap ruh ban mareh sha bar shnong kum sha Shillong bad ki thain Pynursla haba ki nongpang kim lah ban wan phah sumar dalade sha u. Wat la hapdeng kat katei ka jingbun kam, u la iathuh ba u la bynta ia ka por jong u ban rung sha ki khlaw ki btap ban wad dawai kynbat ban shna dawai. Teng teng u la ong ba u hap ruh ban leit sha PHC Wahshyrkhmut ban sumar briew bad ban ia ioh ia phylliew jingmut artad bad ki doktor ha katei ka PHC halor ki kam sumar briew.
Utei u samla um ju oh dor na ki nongpang kiba wan ban phah sumar sha u bad u pdiang kat kaba ki paidbah ki ai sngewbha, wat lada ki bym lah ban ai ruh u ong um ju sngew eiei namar ba u la ong ba u Blei u la ai sap kyrpang ia u ban shakri ia u paidbah da ka jingsumar ia ki jingpang jong ki. “Nga sngew synei ia ki para thain bapli kiba ia duk, nga shakri ia ki katba nga lah ei” u la ong.