Shillong:U nongialam ka seng Congress, U Zenith M Sangma, u la ong ba ka jingiakren ha kaba iadei bad ka jingpynbeit noh ia u pud u sam hapdeng ka jylla Assam bad jylla Meghalaya, ka dang dei ban long kaba bteng, namar ba ban khmih lynti ba tang shisien ban shong ia ka jingialang, yn ym lah ban pynbeit ia u pud u sam.
“Kan bha lada ki ar ngut ki myntri rangbah jong ka jylla Assam bad ka jylla Meghalaya ba kin bteng ia ka jingiakren kumno ban pynbeit ia u pud u sam hapdeng kine ki ar tylli ki jylla” la ong U Sangma.
U nongialam ka seng Congress, u la ong ruh ba ka dei ban don ka mat kaba shai, ha kane ka liang, hynrei ban mynta ym lah ban ong namar ba ia ka jingiakren kim pat pynlong, hynrei hadien ka jingiakren yn sa lah ban ong ia kata ka jingiakren ka long kumno.
U la ong ruh ki don bun ki lad ki lynti ki ban hap ban shim ban lah ban pynbeit noh ia u pud u sam, namar ba naduh mynshuwa hi la ju don shibun ki jingiakren hapdeng ki myntri rangbah, hapdeng ki Chief Secretary level, ki Deputy Commissioner level bad ka sorkar mynta ka dei ban bud dien ruh ia kane.
U la ong ruh ba mynta ki don ki jaka thymmai, kiba wat la kim dei kiba hap hapoh ka jing ia kajia ruh mynta, la iohi ba ki mih ki jing ia kajia.
U la ong ruh ban lah ban weng ia kum kane ka mat ba la slem ka donkam ia ka jingiatrei lang jong ki briew, kiba don bynta bad ki nongialam ki seng pyrthei ha ka jylla.
Phi don ban ong eiei?