Tang shi bnai ym pat dap, la jot rathai ka surok Pdengshakap Muktapur

Ka long kaei kaei kaba ijli ban iohi ia ka jingtrei torti ki Contractor ia ki na ka por sha ka por kaba bunsien ka ju wanrah ia ka jingkhnium na kiba bun ki paidbah nongshong shnong.
Kane ka la jia ha ka shnong Amlarie kaba don hapdeng jong ka shnong Pdengshakap bad Muktapur.
Haba ia kren bad u Rupang mynta ka miet uwei u rangbah u bym shym la kwah ban pynpaw kyrteng ialade uba dei na ka shnong amlarie u la iathuh ba dang ha u bnai ba lai mynta u snem la ai rong thymmai ia kane ka surok, hynrei tang shi bnai ym pat dap bun na ki bynta jong kane ka surok ki la orpait lut, ula iathuh shuh shuh ba haduh kumba 14 km eiei ki bynta jong kane ka surok ba la dep ai rong thymmai kila orpait lut. Kane ka dei ka jingtrei torti palat jong ki contractor la pynpaw une rangbah. Kane ka bynta ba la pait ka dei ha ki bynta jong ka amlarie. Une u rangbah u la pynpaw ruh ba ka daw kaba pynlong ia kane ka dei artad ka jingiaid bun tylli eh ki trok kit mawshun kiba iaid haduh kumba 40/50 tylli ha ka shi sngi, “Lada ki la shna bha ia ka surok, nga ngeit wat lada iaid makna kin trok kan nym long kumne’’ la pynpaw une u rangbah.