Tang kiew sha Sor, ki lehrain ban kren ktien shnong, ong u MLA Sohra

Shillong, 11 Naiur:
Ka Kongthong Welfare Shillong (KWS) ha kane ka sngi Saitjain ka la pynlong ia ka jingpynkup burom ia ki samla ka shnong ba pas ha ki eksamin bapher bapher naduh matrik shaneng ha Khasi National Dorbar Hall, Mawkhar Shillong.
Ha kane ka snem, ki don 10 ngut ki samla ba la pyndep ha ki kyrdan jingpule bapher bapher naduh kiba pass ia ka matrik(klasX)5 ngut, 3ngut ha ka HSSLC (klas XII), uwei ba pyndep Degree bad uwei ba pyndep ia ka post graduate.
Ia kine ki samla ka shnong, la pynkup burom da u MLA ka thain u Bah TW Chyne ba la don lang u u president ka KWS Babu SS Majaw, u Secretary Bah Rothel Khongsit, bad ki riew rangbah,bad ki nong-Kongthongba sah ha Shillong bad ia ka jingialang la pyniaid da u Bah PS Majaw.
Haba kren lyngkot ha kane,u Bah Chyne u la ong ba ki briew tang shu wan sha sor ban pule ki la lehrain ban kren ka ktien shnong lajong bad ki leh rain ruh ban iathuh ba ki dei na la shnong.
“Ngim dei ban lehrain ban pynithuh iala ka shnong haba ki don sha kano kano ka jaka bad ki dei ban sngew sarong namar la ka shnong”,la ong u Bah Chyne.
Kane ka jingkren jong u MLA ka Sohra ka long namar ba bun ki briew tang shu wan kiew sha sor na jaka nongkyndong, ki la lehrain noh ban iathuh ialade na la shnong bad ki leh klet ruh ban kren da ka ktien shnong lajong.
“Haba phi iakynduh para shnong shane sha sor, iakren iakhana da ka ktien lajong, khot ruh da kaba shu kynud sur kumba phi ju leh ha la shnong, ngim dei ban lehrain”, la ong u MLA ka Sohra.
U la kyntu ia ki samla ba kin trei shitom namar ba ha kane ka juk mynta, kam long shuh kaba suk namar ba la bun ki jingtynjuh.
“Haba phi wan sha sor ban pule, wat pynlut ha ki kam bym ler, wat ngop ha ki jingsngewbha ki jingpynshoi hynrei kynmaw ia ki kmie ki kpa kiba la durut khlem tyngkai shuh ia la bor ka sor na ka bynta ka jingthrang jongki ban pynlong briew ia phi”, u la bynrap.
Kane ka jingpnkup burom ka dei ka sien ba hynriew ba ka KWS ka la leh ha kine ki snem shi bynta ban ai mynsiem ia ki samla ka shnong ba kin nang trei shitom ban kiew ha ka jingim.