Tang kiba 10 MT, ki kali, ki lah ban iaid lyngba ka Dwarksuid

Nongpoh:Hadien ba la ioh ia ka Kaiphod na u Project Director ka National Highway Authority of India (NHAI) ba ka jing kieng Dwar Ksuid kaba don ha Umroi Shillong Bye-Pass, ba kam long shuh kaba shngain ban iaid ki kali Kitkhia ne ki kali ba kit palat pud, ka Kong RM Kurbah, Deputy Commissioner ka Ri Bhoi, myn hynnin ka sngi ka la pynmih ia ka hukum ba ym shah shuh ban iaid ki kali kiba kitkhia, hynrei yn shah tang ia ki kali kiba hapoh ka 10MT.

Ka nongrim kaba la pynlong ia ka Deputy Commissioner ka Ri Bhoi, ban khang pyrshah ia ki kali kitkhia, ka dei hadien ba la ioh ia ka Kaiphod na ki stad peit jingkieng ka NHAI, kiba la kdew ba ki don ki bynta hapoh ka katei ka jingkieng kiba la orpait bad kaba lah ban wanrah jingma, lada iaid ki kali kitkhia na katei ka Jingkieng.

Namarkata, na bynta kito ki trok bad ki kali kitkhia kiba wan na ki thaw Jowai, kim dei ban iaid lyngba ka surok Shillong Bye-Pass, hynrei ki dei ban iaid lyngba ka surok na Nongbah Shillong.