Tang ki kam pynroi kiba lah ban iada na ka jingkyntur pud ka Assam: MLA Nongpoh 

Nongpoh: Ka la long ka jingkmen kaba khraw ia ki paidbah ka shnong Khulia, ka shnong kaba don ha syndah eh bad ka Assam, namar hynnin ka sngi ki la ioh ban plie paidbah ia ki 4 tylli jingdonkam ki paidbah jong katei ka shnong, kiba kynthup ia kawei ka Aganwadi Center, kawei pat ka Iing kaba la pynlong kum ka jaka ban tylliat khaw bad Shynrai, kawei ka VIP Galery ha Madan Phutbol bad kawei ka Painkhana paidbah hapoh katei ka shnong.

     Ha kaba plie paidbah ia kitei ki skim sorkar, la sakhi da ka jingdon u Bah Mayraldborn Syiem, MLA ka Nongpoh, u Bah Balajied Ranee, MDC, ki ophisar na ki tnat sorkar, ki rangbah shnong lem bad ki riew rangbah ka thain Marmain.

     Haba iadei bad katei ka jinglah ban plie ia kitei ki kam pynroi, ki paidbah jong katei ka shnong, ki la kmen eh ban iohi ba ka sorkar ka shimkhia ban pynpoi ia ki kam pynroi ha katei ka thain, kaba dei ruh ka thain kaba don ha syndah eh bad ka Sunapur jong ka Assam.
     Ki la don kiba la pynpaw, da kaba ong ba lada ka sorkar jylla, ka kwah ban lait na ka jingshah kyntur pud ha ka Assam, kam dei ban shu kut tang ha ka jingiakren, hynrei kaba bha eh ka long ban shimkhia ha ka ban pynpoi ia ki skim pynroi, namar kan long ka jingmyntoi ym tang ia ki paidbah, hynrei kaba kham kongsan eh ka long ba lyngba ki kam pynroi na Meghalaya, kan long kum kawei na ki lad ban iada na ka jingwan kyntur pud ka Assam.
      Namarkata, ka sur kaba la mih na ki paidbah ka long ba ki la kyntu ia u Nongmihkhmat ka Nongpoh, ba u iakren sha ka sorkar na ka bynta ban shimkhia da kaba pyrkhat kyrpang ia ki shnong kiba don ha khappud, namar dei ma ki kiba iada ia u pud u sam jong ka jylla.
     Na ka liang u Bah Mayraldborn Syiem, u la ong ba kum u nongmihkhmat u da trei shitom bad don eh kata ka jingthmu ban wanrah ia ka jingkylla bad ka roi ka par ha ki shnong ki thaw bad khamtam eh ia kito ki shnong kiba don ha khappud bad ka Assam.
     Kumta u la kyntu ia ki paidbah, ba kin long kiba iaishah bad kiba kloi ban iatreilang, khnang ba kum u MLA, un nanglah shuh shuh ban nangtreibha na bynta ka bha ka miat jong ki paidbah kiba sah ha katei ka thain, khamtam eh ba katei ka thain ka dei ka thain kaba don ha khappud eh bad ka Assam.