Tang jait ‘Kharshanbha’ ka Seng Khasi

Shillong, 23 Risaw:
Katkum ka Khasi Hills Autonomous District (Khasi Social Custom of Lineage) Act 1997, ka Seng Khasi Seng Kmie Mawkhar, ka la pynkop bor  na ka KHADC, kala shim ia ka bynta ban tang jait thymmai ia u shynrang Khasi ba ioh tang ia ka bym dei Khasi.
Ha kane ka 17 tarik Risaw, ka Seng Khasi ka la pynlong ia ka tang jait thymmai ia u khun jong u Bah Ankush T Marbaniang bad ka Nang-Vaishali Shyam kiba sah ha Laitumkhrah da ka jait ‘Kharshanbha’.Ia ka niam ka rukom la pyndep da ka Riew Tymmen Riewsan Committee jong ka seng ryngkat ka khnong ka bishar ia ka jait thymmai ha kaba la pyndep da u Rangbah Donbokstar Kurkalang bad nangta la pynbud sa ka jer ka thoh ia ka nam ka kyrteng jong u khun jongki da u ‘Schuyler James Kharshanbha’ da u Rangbah Romeo Mawrie.Ia kane ka tang jait la sakhi lang da ka Seng Khasi Nongthymmai Pyllun baroh kawei, ki kur ki kha, ki lok ki jor, ki para shnong para thaw bad ki marjan marpa. Ka Seng ka kitbok kitrwiang ia kane ka jait thymmai, ‘Kharshanbha’ ba kan roi ha ki pateng pakit hapoh ka bri u Hynniewtrep, la ong ka kyrwoh na u Bah KS Marbaniang u secretary ka Riewtymmen Riewsan Committee, Seng Khasi Seng Kmie, Mawkhar.