Tang hapoh 1,200ngut ki nongthep vote ha kawei ka jaka, rai ka EC

Shillong:Ka Election Commission of India, mynta ka sngi, ka la pynmih ia ka kyrwoh, kaba iathuh ba ka jingiakren, ka dang iaid mynta hapdeng ka UIDAI bad ka Commission, tangba kam shym la batai satia, halor ka jingthmu jong katei ka jingialang, wat la lehse, ka thew, na ka bynta ban pyniasnoh ia ki kyrteng jong ki nongthep bad u aadhar number bad ka Commission, ka kren shai ruh ba u nongthep vote, u lah ban thep tang kawei ka vote bad la pynthikna ruh ban weng noh ia ki vote snaiap, hapoh lai bnai ha baroh kawei ka ri bad la rai ruh ban pynbeit pura ia ki kyrteng jong ki nongthep da ka jingiasyllok lang bad kito kiba peit ia ka syrnot sngi kha bad kumjuh ka syrnot sngi iap bad ka jingweng ne pynrung kyrteng ia ki nongthep vote, kan dei beit, katba kum ki kyndon ain jong ka Representation of Peoples Act, 1950, ha kaba ki seng sain pyrthei, ki lah ban iaid katba kum katei ka ain.

Ka ECI, ka la rai ruh ban pynshlur ia ka jingpynrung kyrteng kaba pura jong baroh ki nongshong shnong bad kumjuh sa ka jingleit shim bynta jongki ha kaba thep vote bad kumta, ka la shim ia ka rai, ba yn nym shah, ban buh ia kawei ka jaka thep vote, kaba long palat ia ka 1,200 ngut ki nongthep vote bad ba ka jaka thep vote, kam dei ban jngai palat na ka 2 kilometre jong ka jingdon ki shnong lane ki nongthep vote bad ia katei la rai, ba lada ka dei ha kino kino ki shnong kiba jngai ne kiba rit ruh, kan dei ka kamram jong ka Commission ban pynbiang ia kitei ki jingbuh kyndon haneng.

Ban ailad ia ki seng sain pyrthei, ba kin iashim bynta ha kane ka jingpyniaid beit ia ka elekshon, kumta U Gyanesh Kumar, Chief Election Commissioner, ula bthah ia ki 36ngut ki CEO, nangta sa 788ngut ki DEO bad sa 4123ngut ki ERO, ba kin pynlong ia ki jingialang bad ki seng sain pyrthei bad ban pyndep, ha shwa ka 31tarik Lber 2025 bad ka komishon, ka khot sngewbha ruh ia ki seng sain pyrthei, ba kin leit ban iakynduh bad ki nongialam jong ka komishon, da kaba kin ia pynbeit lang ia ka por bad la pan jingmut ruh na ki seng sain pyrthei, ba kin phah ia ki jingmut ba ki don ban pyniaid beit ia ka elekshon, ha kaba ki lah ban phah ha shwa ka 30tarik Iaiong 2025.