Tang ha Lad Rymbai, don 35 tylli ki wine store, ong ka FKJGP

Khliehriat:Ka Seng FKJGP Khliehriat circle, ka sngewkhia haduh katta katta, halor ka jingjyllei palat ki Wine Store hapoh East Jaintia.

Katkum ka RTI ba ka seng ka ioh ha kine ki khyndiat sngi, ka seng ka sngew phylla ban iohi ba tang ha Ladrymbai, ka shnong kaba rit ki Wine Store, ki don haduh 35tylli, ka Shnong Mokhep kaba don tang shi troh ka don haduh 12tylli ki Wine Store bad ka Dieng Shynrum ruh ka shnong ba rit ka don haduh 9tylli ki Wine Store.
Ka jubab ba ka seng ka ioh naka Tnad Excise ruh ba ka Tnad kam shym la buh kyndon ia ki dukan die kiad, kata ban don ka jing iajngai kawei ka wine store na kawei pat.

Ka Seng ka kyrpad ia ki Rangbah Shnong ba kim dei ban ai NOC kulmar, khamtam ban plie ia ki Wine Store, namar ba ynda la bun palat ki Wine Store, kin wanrah jingma ia ki khun samla bad ki longkpa ka thain, namar ba kine ki Wine Store ruh ynda ki la bun palat kim iapher na ki nong die kyiad beain kiba lah ban pynjot ia ka imlang sahlang bad khadduh ka seng ka maham ruh ia ka Tnad Excise ba kam dei ban dang ai laisen, ha kito ki shnong ba la bun palat ki Wines Store.