Tang ha ki kot la dep trei ia ka surok Umshong-Iapmala- Wahsarang

Jowai, 13 K’Lyngkot:
Ka jingpyntrei ia ka surok Umshong-Iapmala –Wahsarang ka paw ba la dep tang ha ki kot ki sla katba kaba paw pyrthei hi, katei ka surok ka dang long kaba khohruh khoh ram wat tang ka rong ruh ym pat dep ban siang. Katei ka surok ka jrong tang 4 km. Katei ka surok ka khlad na u Surok Rymbai-Suchen kaba la sdang pyntrei naduh u snem 2007 bad la mang ban pyndep ha u snem 2009. Ia katei ka surok la pyntrei lyngba ka skim PMGSY jong ka Ministry of Rural Development jong ka sorkar kmie ha ka jinglut kaba T. 130.11 lakhs bad la pyndep ia ka jingtih kyndew bad siang maw, shyiap nalor kiwei kiwei kynthup ruh ia ka dor ban maramot hapoh san snem kaba la kut noh ha u 2013.
Shuh shuh dangshen ka la don biang sa kawei ka skim kaba la bei pisa da ka juh ka Ministry sorkar kmie bad la mang ban pyndep hapoh u ban September 2015, hynrei katei ka surok ka dang sah hi kumjuh bad la ioh tang ia u mawria maw ship, ha shi lynter utei u surok bad tang shiteng utei u surok la dep ban siang rong.
U Waheh Shnong ka shnong Wahsarang bad Lumshken ki la iathuh ba ka jingpyntrei ia katei ka surok ka la sangeh mynta la kumba shi bnai khlem tip ia ka daw.
Haba iakren bad une u nonglum khubor, u ma Makham Bareh, Waheh Shnong ka Lumshken u ma Bareh u la ong “Ngi la ap khmih lynti ban ioh ia ka surok rong namar ka dei tang kane ka surok kaba lah ban pynpoi ia ki briew bad ia ki mar rep mar riang jong ngi sha ki iew ba hajan kum sha Rymbai, Ladrymbai bad Khliehriat. Hynrei  ka jingslem ban pyndep ia kane ka surok ka la buh ia ki paidbah ha ka jingeh”.
Ka jinglut baroh na ka bynta ban trei ia katei ka surok katta haduh ban da siang rong ka long. T. 186.295 lakhs nalor ka T. 18.611 lakhs na ka bynta ban pynbha ia kane ka surok na ka bynta san snem.
La mang ban pyndep lut ia ka jingtrei baroh ha hapoh 9 bnai katta ha u September 2015, hynrei haduh une u bnai Nyngkong u ne u snem 2016, ka jingtrei ka dang iaid tang shiteng bad mynta lei ka la sangeh noh la kumba shibnai.
Na ka liang ki Waheh Shnong bad ki paidbah nongshong shnong ki la kyntu ia ka tnad PWD ba kan pyndep kloi ia katei ka surok khnang ban myntoi ki paidbah.