Shillong, 7 Nailar:
Bunsien ki briew ki shah thlia ha ki nongtrei sorkar bad kawei ka kam kaba dei ban dep tang shi sngi, ka shim por da ki taiew bad da ki bnai hynrei nangne shakhmat, ki paidbah ki dei ban tip ba u number ‘1-800-3453644’ un sa ai ia ka jingshai haba ki iakynduh ia kano kano ka jingiadei ha kaba iadei bad ki kam sorkar.
Une u number u dei jong ka Meghalaya Integrated Information System (MIIS) u dei u bym lut eiei, uba la buh na ka bynta ban pdiang ia ka jingujor ne ka jingtip ba ki paidbah ki kwah ha kaba iadei ia kano kano ka kam.
Ia ka MISS la pyntreikam da u Myntri Rangbah ka jylla u Dr Mukul Sangma naduh u Jylliew mynshem snem.
Wat la bun ki paidbah kim pat da nang ne da tip ban shim kabu na une u number, hynrei ka la don khana jingjop bad ia kane la ioh ruh ban iakren bad ki katto katne ngut ki riew madan kiba la ioh jingiarap bha da ka jingujor da une u number.
Ki paidbah ki lah ban phun ha une u number 1-800-3453644 bad buh ia ka jingujor halor kano kano ka kam kum ka jingpynslem ban ioh license, ban shem jingeh ban ioh um, skhim sorkar, mar reshon, license niah kali, baibam bad kiwei kiwei.
Uwei u rangbah uba kyrteng Bah Wallambok Shadap u la u iathuh ba kane ka atiar jong ka sorkar ka long kaba larkam namar ba ka la iarap shisha ia u kum u riew madan.
‘Nga la sngew phylla da kaba pyndonkam da kane ka rukom. Nga la ujor ia da ka MIIS ha kaba iadei bad ka jingduna um ha Malki”, la ong u Bah Shadap ha kane ka sngi Balang.
Shwa ban ujor sha ka MIIS, u la ong ba u la iakren ia kane ka jingduna um bad ka dorbar shnong bad u Rangbah Dong.
“Hadien ba nga sngewthuh ba kane ka kam ka long palat ia ka bor jong ka shnong, nga la rai ban ujor noh da kaba shu phun ha ka MIIS. Mar mar hadien ba la ioh pdiang ia ka jingujor jong nga, ki la pynthikna ba kane ka jingeh yn pyndep hapoh 48 kynta”,la ong u Bah Shadap.
Wat la kim lah ban pynbeit ia kane ka jingeh hapoh 48 kynta hynrei uwei u ophisar la phah da u Chief Executive Officer ka Shillong Municipal Board (SMB) u la wan ban tied jingkhang ha ka iing jongu hadien ba la ujor ia kane ka jingeh hadien 15 sngi ban weng ia ka jingkyrduh um.
“Kum u riew madan ngam lah ban pynsngew ia ka jingeh sha u CEO hynrei da dei lyngba ka MIIS ba ka jingujor ka la poi sha u”, la ong u Bah Shadap.
Uwei pat uba ioh jingiarap na kane ka MIIS u dei u Bah L Sungoh uba iathuh ba la don ka jingpynslem na ka liang ka ophis u District Transport Officer (DTO) ha Jowai ban pynthymmai ia ki kot kali jongu.
“Nga dei ban ioh ia ki kot ki sla hapoh ar ne lai sngi hynrei man ba leit mih sha ophis ka DTO, la iathuh da ki nongtrei ba ki kot kali jong nga kim pat long. Kane ka la iai bteng haduh da ki taiew”, la ong u Bah Sungoh.
Hadien kane u la sngew bitar ia ka jingleh katei ka ophis hynrei uwei u paralok jongu, u la ai jingmut ban ujor lyngba ka MIIS ia kane ka jingeh ba la leh da ki nongtrei ka DTO.
“Hapoh khyndiat sngi hadien ba nga la ujor, nga la ioh ia ka phun na ka ophis DTO ba ki kot kali jong nga ki la biang bad lah ban leit shim noh na ophis. Nga hap ban kubur ba lada ym dei na ka MIIS, nga tharai ngan hap ban ap sa ar ne lai bnai ban ioh ia ki kot ki sla”, la ong u Bah Sungoh.
Uwei pat uba ioh jingiarap na kane ka MIIS u dei u Bah Marplie Lyndem uba la iathuh ba u la lait na ka jingshah pyndik ha ki nongtrei ka DTO, Shillong.
‘Nga la leit sha ophis u DTO ban weng noh ia ka jingtah ram (hypothecation) na ka kali jong nga hadien ba la dep pynkhuid lut ia baroh ka ram. Nyngkong la ong ia nga ban wan hadien san sngi ban shim ia ki kot ki sla. Hadien kane, man ka por ki nongtrei na ophis DTO ki la ong ba kim pat ioh pdiang ia ki kot ki sla. Kane la bteng da ki bnai”, la ong u Bah Marplie.
U la ong ba ka long shisha kaba sngew dom bad sngew bitar namar ba um tip lad shano ban leit ban pyndep ia kane ka kam.
“Ha kaba khadduh, nga ioh jingtip shaphang ka MIIS na ki paralok. Nga la rai ban ujor da kaba phun sha ka MIIS. Nga la sngew lyngngoh haba nga la ioh ia ka phun na MIIS kaba pyntip ba ia ki kot ki sla jong nga ki dang don ha Secretariat. Ka MIIS ka la iathuh ba ngan sa ioh ia ka phun na ophis u DTO ha ki khyndiat sngi ban leit shim ia ki kot ki sla”, la ong u Bah Marplie.
Thik ka jia shisha hadien khyndiat sngi, la ioh phun na ophis u DTO ban leit shim noh ia ki kot ki sla kali,u la ong.
‘Nga sngew phylla ia kane ka jingurlong bad ki paidbah ki dei ban shim kabu na ka bynta ka jingmyntoi jongki lada ki shem jingeh ha kaba iadei bad kano kano ka tnad sorkar”, la ong u Bah Marplie.
Ha kajuh ka por, uwei u heh sorkar u la iathuh ba la don ka jingduna ka jingtip na ki paidbah shaphang ka jingtreikam kane ka MIIS.
“Ngam artatien ba kane ka rukom kan sa iaid kam bha shsien ba ki paidbah ki la nang ban pyndonkam ia ka” u la ong.
U la iathuh ba ka MIIS ka ioh pdiang ia ka phun kumba san tylli ha ka shi sngi.
“teng teng ngi ioh pdiang ar tylli ka phun ha ka shi sngi, teng teng tang kawei” u la ong.
U la iathuh ba kane ka call centre ka treikam kum ka nongiarap ia ki paidbah kiba iakynduh jingeh ban pyndep ia ki kam jongki.
Phi don ban ong eiei?