Tang da ka jingiatreilang, ym pat iateh kular ka NEDA

Shillong, 13 Naitung:
Ka jingialang jong ka kynhun synrop pyrshah Congress ha kane ka dong mihngi ka North East Democratic Alliance (NEDA) kaba long hynne ha nongbah Guwahati, kam pat shym la iasoi sos kular ban iakhun elekshon hynrei ki la shu shim ia ka rai ban iatreilang na ka bynta ban pynjah kyrteng ia ka Congress ha kane ka thain.
Ha kane ka jingialang la wan iashim bynta u Myntri Rangbah ka Assam u Sarbananda Sonowal, Arunachal Pradesh u Kalikho Pul, u Pawan Kumar Chamling na Sikkim bad na Nagaland u TR Zeliang, u President ka UDP u Dr Donkupar Roy, u President ka NPP u Conrad K Sangma, General secretary ka BJP u Ram Madhav, u president ka AGP u Atul Bora, u heh ka BPF u Hagrama Mohilary, u nongialam ka Ganashakti u Ranoj Pegu, ki nongialam na ka Mizo National Front, Sikkim Democratic Front, Naga People’s Front bad kiwei kynthup u myntri ka DoNER u Dr Jitendra Singh.
Katkum ka khubor, la iathuh ba ia kane ka jingialang kaba la plie paidbah da u President ka BJP u Amit Shah, ka la iakren bun ki kam ba iadei bad ka elekshon ha kane ka thain.
U Amit Shah u la pynshai ba ka jingthmu jong ka NEDA ka long na ka bynta ka bha ka miat bad ka roi ka par jong ki jylla Rilum ka thain shatei lam mihngi jong ka Ri India.
Hadien ka jingiatai kaba sani la rai ba baroh ki seng sain bym dei Congress kin iatrei lang ha kane ka liang ban wan rah ia ka jingjop bad ban lah ruh ban weng ia ka jingbam sap jong ki sorkar Congress.
Halor kaba iadei bad ka jingiatehlok ym shym don kano kano ka jingrai, la ong ka khubor na ka BJP Meghalaya.
Nalor ka sain hima sima, ka jingialang ka la iakren ruh ia ki kam pynroi jong ka thain, ki kam khappud,bad kiwei pat.
Ha kawei pa ka khubor, na ka liang jong U Bah LG Laloo, u nongkren jong ka seng BJP, ula iathuh ba ha ka jingplie ia ka North East Democratic Alliance (NEDA) da u Amit Shah u National President jong ka BJP kaba la long ha Guwahati ha ka 13tarik u Naitung 2016 ha ka ba la ia don lang jan baroh ki seng sain hima bym dei Congress, la pynshai ba ka jingthmu jong ka NEDA ka long na ka bynta ka bha ka miat bad ka roi ka par jong ki jylla Rilum ka thain shatei lam mihngi jong ka Ri India. Hadien ka jingiatai kaba sani la rai ba baroh ki seng sain bym dei Congress kin ia trei lang ha ka ne ka liang ban wan rah ia ka jingjop bad ban lah ruh ban weng ia ka jing bam sap jong ki sorkar Congress. Halor kaba iadei bad ka jing ia tehlok (prepoll alliance) ym shim don kano kano ka jingrai.