Shillong, 11 Nailur:
Ki nonghikai kiba ialeh ia ka eksmin Diploma in Elementary Education lane (DElEd), ki pynpaw ia ka jingpyrshah halor ka result, kaba la pynmih da ka NIOS, ha ka 9tarik mynta u bnai, namar ba ki don shibun bah ki kynrum kynram, ong ka khubor.
Kitei ki nonghikai, kiba hikai ia ki khynnah naduh Class I haduh Class VIII, ki dei kiba ialeh ia katei ka eksamin, na ka bynta u snem 2014-15 bad ki don baroh 7hajar ngut, katba kum ka jing ia thuh jong U bah Niwel Dkhar, uba ialeh ia katei ka eksamin. U Bah Niwel, u iathuh ba na Jaintia Hills, katba kum ka jingtip jongu, ki don 1hajar ngut kiba ialeh, hynrei na kitei ki 1000ngut, ki don tang 19ngut kiba pass.
Kaba la kynnoh, da utei u nonghikai, ka long ba ka rukom khein marks, ka long kaba huri hura haduh katta katta, ha kaba ka NIOS, kaba pynialeh ia katei ka eksamin, kam shym la khein satia ia ki eksamin ba ki ju leh hi ki nonghikai, kum ka Practical, Workshop, Assignment bad ki marks, ba ki nonghikai ki ioh na kitei ki lai bynta, ym shym la pyni satia.U bah Niwel, u iathuh ba ha ki ar tylli ki eksamin pat, ki don ar jait ki jing ai marks bad kitei ki long 70marks ia ka Theory bad 30 marks ka Practical.
La iathuh ba ka Meghalaya SSA School Association (MSSASA), kaba iai buddien ia katei ka result, kan nym pdiang satia ia kane ka result jong ka NIOS bad U bah Niwel, u ong ba lada jia ba ka sorkar Jylla, kam sngap ia ki jingdawa jongki, ki nonghikai MSSASA, kin hap ban pynlong da ki jingiakhih kiba tyngeh ha ki sngi ki ban wan shakhmat.
Ka MSSASA, ka khot ka wer ia baroh ki nongialeh eksamin, naduh ki nonghikai SSA, 4thTeachers, Adhoc, Govt bad kiwei kiba hap hapoh East bad West Jaintia Hills District ba kin poi khnang sha ka jingialang ba kyrkieh ka ban long ha ka 13 tarik mynta u bnai hapoh Khliehriat West Community Hall East Jaintia Hills District ha ka por 11 baje mynstep ban pyrkhat halor kane ka jingleh thurmur jong ka tnat DERT bad NIOS, kaba ki ong, ba ka dei ka jinglehkai ia ka lawei ki nonghikai.
Phi don ban ong eiei?