Tang 12 ngut kiba lah ban tah iit iong, ia ka kali, kynthup ia U James K Sangma

Bah Khien Mawkon

Ha kine ki sngi ka la jur bha ka jingbat ki pulit ia ki kali kiba tah da ki plastic iong ha ki iit kali jong ki lane kiba ki ia ong paidbah ka iit iong bad ki la don da ki hajar tylli ki kali kiba la shah bat, kiba la shah tar noh ki plastik na iit kali jong ki bad kumjuh ruh ki la shah dain kuna ha ki pulit.

Hynrei haba ki pulit ki ju bat ia ki kali kiba tah iit iong , ka sur kaba mih na ki paidbah ka long ba balei la bat tang ia ki kali jong ki rit ki ria katba ki kali jong kiba heh ba hain pat ki iaid laitluid. Hynrei ngi tip ruh ba ka don ka ain ka shah ia ki katto katne ngut ki longheh ba kin tah iit iong na ka bynta ka jingshngain jong ki ne kita kiba la pynhap hapoh ka Z Plus Security bad ki Z Security, tangba ngim tip katno ngut ki don ki Z Plus bad katno ngut ki Z Security ha kane ka jylla jong ngi.

Kumta khnang ba ki paidbah kin shai halor kane , u nonglum khubor jong ka Batei TV u la pan jingtip lyngba ka Hok Wad Jingtip lane ka Right To Information na ka ophis jong ka tnat Transport jong ka sorkar jylla bad ia ka jingtip sha u nongwad RTI la pynpoi lyngba ka Police Department ha la ka jong ka jong ka District. Ki don ki District kiba la pynpoi ia ka jubab jong ki lyngba ka email bad ki don ruh ki bym pat lah ban pynpoi.

To mynta ngin ia peit shuwa ia ka jubab ba la ioh na u Public Information Officer jong ka Police Department na East Khasi Hills District. Halor ka jingkylli ba la buh ba katno ki don kita ki Z Plus bad Z Security ha kane ka jylla, kane ka ophis ka la jubab ba ka ain katkum ka section 8 (1) (g) jong ka RTI Act 2005 yn ym lah ban ai jingtip ia kane hynrei la pyntip ba ka don ka Committee ka ban peit iano ban shah ban tah iit iong bad ki dkhot jong kane ka komiti ki kynthup ia u Principal Secretary, Home ( Police), Principal Secretary Transport Department , Secretary Law Department bad u Driector General of Police. Haba kylli katno tylli ki kali sorkar kiba la ioh jingbit ban tah iit iong, ka jubab ka long kane kajuh ka kyndon ain jong ka RTI Act 2005 ka shah ban buhrieh ia ki jingtip.

Hynrei katkum ka jubab ba la ioh na u Deputy Suprintendent of Police jong ka South Garo Hills District pat u la jubab ba ki don 2 ngut ki Z Plus Security ha kane ka jylla kata u Lat ka jylla u C.H Vijaya Shankar bad u Myntri Rangbah ka jylla u Conrad K Sangma.

Ki Z Security pat ki don 10 ngut kata u Lamphang ka iing Dorbr Thaw-ain ka jylla u Thomas A Sangma, ki 2 ngut ki Symbud Myntri Rangbah kata u bah Prestone Tynsong bad u bah Sniawbhalang Dhar, u Chief Justice ka High Court u S Vaidyanath, 2 ngut ki Judge ka High Court u bah H.S Thangkhiew bad u bah Wanlura Diengdoh, u Additional Judge ka High Court u Biswadeep Bhattacharjee, u Chairperson ka Meghalaya Human Rights Commission u Justice T Vaiphei, ka Director General of Police ka kong Idashisha Nongrang bad u MLA barim u James K Sangma.

Ka jubab na u Deputy Superintendent of Police ka South Garo Hills District ka la kren shai ba lait na ki Z Plus bad Z Security , kino kino ki kali kin ym lah ban tah iit iong. Katkum kane ka jubab ka pyni ba ki don tang 12 ngut ha kane ka jylla kiba lah bah tah iit iong ia ki kali jong ki. Hynrei katkum ka jubab na ka Police Department na ka East Khasi Hills pat ngim tip nalor kine ki 12 ngut sa katno ngut kiba la ioh jingbit ban tah iit iong kumba la jubab ba ka don ka komiti ka ban peit iano ban ai jingbit.