“Tang 1 billion cubic litar ka umslap ïoh pynlang na ka 63 billion cubic litar”

Shillong:U Myntri Rangbah ka Jylla Conrad K Sangma ha ka sngi Balang, ula ong ba ka Jylla Meghalaya ka ïoh haduh 63 billion cubic litar ka um ha ka shisnem tang na u slap, kaba dei ka jingïoh ba heh bha hynrei, ka Sorkar ka la lah pat ban pynlang tang 1 billion cubic litar na kane ka umslap.

“Ka Meghalaya ka dei kawei na ki jaka ba jur bha u slap ha pyrthei. Ngi ïoh haduh 63 billion cubic litar ka um manla u snem hynrei na kane, haduh 31 billion cubic litar ka la tuid sha Bangladesh bad 31 billion cubic litar kala tuid sha Assam,” ula ong haba pyllait ïa ka Meghalaya Water Smart Kid Campaign, ka sienjam ba la shim lyngba ka Jal Jeevan Mission (JJM) ban pynsngewthuh ïa ki khynnah halor ka jingkongsan ban pynlang bad tyngkai ïa ka um.

U Myntri Rangbah ula ong ba kum ka sienjam ha ka jingïaleh ban tyngkai bad pynlang ïa ka um, ka Sorkar Jylla ka la shim ïa kiba bun ki sienjam, kiba la kyrshan da ki jingbei pisa ba wan nabar (Externally aided project (EAP) bad ka Ministry of Jal Shakti ka Sorkar India.
U pyntip ba haduh 1000 tylli ki jaka pynlang um la shna ha kylleng ki jaka ka Jylla khnang ban lah pynlang ïa ka um bad nang pynbun ïa ka um ha ka mei ramew lyngba ki project bapher bapher. “Ngi la pyrshang kat kaba lah ban tyngkai ïa ka um namar ka long kaba kongsan ban pynthikna ïa ka jingneh bad jingpynim pat ïa ki tyllong um,” ula ong.

U Conrad u pyntip ba ka Tnat Public Health Engineering kala ïoh bun bah ka song pisa na ka JJM bad EAP, kaba la jan kot ïa ka T.8000 klur. “Ngi don ka jingïaleh hakhmat jong ngi bad ki Ophisar kila treikam khlem shongthait ban kynjoh ïa ka thong ha kaban pynthikna ba baroh ki Longïing ha Jylla kin ïoh ïa ka um,” ula ong.
Ha kajuh ka por, u Myntri Rangbah u pyntip ba hapoh ka JJM, ka Jylla kala ïoh ïa ka khusnam kum ka Jylla ba pyntreikam bha (best performer) da ka Ministry ka Jal Shakri nalor ka jingïoh ïa ki song pisa. U pyntip ba ka Jylla kala pyndep palat 4 lak ki longïing ha ka jingpynïoh kor um hapoh Ïing bad hapoh u Lber 2024, ka thong ban pyndep ka long 6 lak ki longïing.

Ha kane ka jingïalang, u Myntri Rangbah ka Jylla bad u Myntri ka Tnad PHE Marcuise Marak, kila aiti ruh ïa ka khusnam Water Guardian halor ka jingpyrshang ban ïada bad tyngkai ïa ki tyllong um.
Ïa kane ka khusnam la ai sha ka shnong Lumshyiap bad ka Water Sanitation Community ka Ri Bhoi District, ka Shnong Darechikgre bad ka Water Sanitation Community ka West Garo Hills District lem bad ka shnong Dura Kantragre bad ka Water Sanitation Community ka West Garo Hills District.