Nongpoh, 08 Nailur: Ki Pulit ka Umiam Police Station, ki la leit ban tam ia kawei ka metiap jong ka riew kynthei kaba la per ha sla um jong ka Pung Umiam.
Ha kaba nyngkong, ki Pulit ki la shu leit ban tam ia katei ka Metiap kaba la per hapoh katei ka Pung bad ki khlem ithuh ne tip ba katei ka metiap ka dei kaba na kano ka jaka , hynrei hadien katto katne por, la ioh jingtip ba katei ka riew kynthei, ka dei kaba la tip kum ka Diamond Chyne na Nongmynsong, Shillong, ia kata la pynshisha da kiba haiing bad ka khun jong katei ka longkmie kaba la iohtam da ki Pulit.
Haba ki Pulit ki la ioh ban iakren bad kiba haiing jong katei ka longkmie, la ioh jingtip ba katei ka longkmie, ka la jah na iing ha ka step 7 tarik mynta u bnai bad ym lapdien shuh ba shano ka don.
Haba la sei ia ka metiap jong katei ka longkmie bad ha ka jingtohkit ki Pulit, la lap ba ym shym la don kino kino ki dienmong ne ki dak jingmynsaw ha ka dur ka dar bad ha ka met jong jong katei ka longkmie, ha kaba la suba jur ba lehse ka la shu ngam jyllop hi hapoh katei ka pung Umiam.
Ia ka metiap jong katei ka Longkmie, la rah noh sha ka jaka buh metiap ha Nongpoh Civil Hospital, kata na bynta ban leh ia ka Post Mortem, hynrei kiba haiing, ki la kyrpad sha ki briew ka Ain ba kin pyllait noh na kaba leh ia ka Post Mortem, namar ba kim don kano kano ka jingsuba sniew eiei ruh em halor katei ka jingkhlad jong katei ka longkmie bad kaba la per ha sla um ha pung Umiam.
Phi don ban ong eiei?