|
Da u Bah Philip Marweiñ
Ki sngi ki la tyllun stet katta katta haduh ba la sah sa tang 12 sngi ei ei ban leit thep-vote na ka bynta ban jied ia ki 58 ngut ki MDC ban leit mihkhmat sha iing dorbar thaw ain jong ka Khasi bad Jaintia Hills District Council ka ban long ha ka 27 tarik mynta u bnai Rymphang, 2019 (Sngi Balang). Ha kane ka kynti jong ka jingiathep-vote ki nongthep-vote kynthei ki tam ia ki nongthep-vote shynrang da 35,046 ngut ha Khasi bad Jaintia Hills District Council ilekshon. Ki nongthep-vote kynthei ki don baroh 5,57,465 ngut katba ki nongthep-vote shynrang ki don 5,22,419 ngut.
Ki party kiba don mynta ha ka lympung iakhun ia ka ilekshon MDC ki dei ka UDP, ka NPP, ka INC, ka PDF, ka HSPDP, ka KHNAM, ka JDU bad ki Independent. Ki party kiba pynieng kham bun ki kyrtong ki dei ka UDP, ka NPP bad ka INC. Ka UDP ka pynieng haduh 52 ngut na ka bynta 58 seat, ka NPP ka pynieng 48 ngut katba ka INC pat ka pynieng 47 ngut ha Khasi bad Jaintia Hills. Ka PDF ka pynieng tang 24 ngut, ka HSPDP ka pynieng tang 14 ngut, ka KHNAM ruh tang 8 ngut, ka JDU lei lei tang 1 katba ki Independent ki don jin haduh 37 ngut. Tang na ka jingpynieng ia ki kyrtong ruh la sngewthuh shai ba ha kano ka kyrdan kine ki party ki ieng.
Kumba ka long ha kane ka kynti hi, ka jingiakhun ban ioh bat ia ka bor synshar ha Jaintia Hills District Council kan long hapdeng ka NPP bad ka UDP. Ka INC, kumba ka long mynta shiwat, ka tlot bha ha Jaintia Hills bad ym thikna satia la ka lah ne em ban wan balai. Ha Jaintia Hills kiba lah ban pynkyndit kin dei ki Independent bad malu mala na ka PDF. Ka KHNAM lei lei kam don Kandidet ha Jaintia Hills, tip balei ba kam lah ban sei kyrtong. Lehse dei na ka jingiapait iapra jong ka ne lehse kam pat suhthied ei ei hangtai. Ka jingiakhun hapdeng ka NPP bad ka UDP ha Jaintia Hills ka long kaba itynnat bad kiba iabiang bor bha haduh ba lehse ki lah ban ia-ioh seat jan mar katjuh. Ngim pat tip la kine ar party kin iatreilang ne em hadien ka ilekshon MDC namar ha ka jylla kine ki iatreilang hapoh ka MDA.
Haba phai pat sha ka Khasi Hills District Council, ha kane ka kynti, ka jingiakhun kaba tyngeh bha ka long hapdeng ka INC bad ka UDP. Hynrei, lada ianujor hapdeng ka INC bad ka UDP, dang tam hi ka INC. Ka INC ruh kam dei ban sngew khla ialade namar ha ki jaka ba ka ju khlain la knieh noh ka NPP bad ka PDF. Ka NPP ruh kam da duna namar ka lah ban pynkyndit ha ki katto katne ki jaka (constituency) wat la ka pynieng tang ha ki 18 tylli ki Constituency na ki 29. Kumba ka long mynta, ha Khasi Hills District Council hi ka jingkhlain ka kham don ha ka liang jong ka INC bud ka UDP bad ka NPP. Hynrei, kiba lah ban pynkyndit kin dei ki kyrtong na ka PDF namar kane ka party ka pynieng haduh 15 ngut. Ki Independent ruh kin pynkyndit, ki lah ban pynliem ia ki jong ki party ha ki katto katne ki jaka. Ka HSPDP te ha kane ka kynti, kam khlain shuh kumba long mynshuwa, ka la tlot bha. Kam shai ei ei nangno kein kan ioh knieh ia ka jingjop? Hynrei, la katta ruh kam dei ban duh jingkyrmen namar ki kut kiba khlain jong ka ki dang don hi ha Nongstoin, Rambrai-Jyrngam bad ha Mawkyrwat. La katta ruh ha kine lai jaka kane ka seng ka dang syier bha. Na ka liang ka KHNAM pat kam dei ban kyrmen than namarba ka la mih na iing sha madan thma da ka jingiapait iapra. Wat la katta ruh ka la lah ban pynieng haduh 8 ngut ki kyrtong.
Ka long ruh kaba donkam ban pynkynmaw hangne ba ka sngi thep-vote na ka bynta ka MDC ilekshon ha Jaintia Hills bad Khasi Hills kan long ha ka Sngi Balang 27 tarik mynta u bnai, naduh ka por 7 baje mynstep haduh ka por 5 baje janmiet. Ki don haduh 2,51,514 ngut ki nongthep-vote na ka bynta ka Jaintia Hills District Council, tam ki kynthei ban ia ki shynrang. Ki kynthei ki don 1,29,684 ngut katba ki shynrang ki don 1,21,830 ngut. Ha Jaintia Hills ki nongthep-vote kynthei ki tam ia ki nongthep-vote shynrang ha ki 26 tylli ki Constituency. Na ka bynta ka Khasi Hills District Council pat ki nongthep-vote ki don baroh 8,67,924 ngut, kham bun ki kynthei. Ki kynthei ki don haduh 4,27,781 ngut katba ki synrang pat ki don 4,00,589 ngut. Ha Khasi Hills ruh ki nongthep-vote kynthei ki tam ia ki nongthep-vote shynrang ha ki 25 tylli ki constituency.
|
Phi don ban ong eiei?