Talasi ki pulit Shallang ia ka iing u nong iarap ka GNLA

Nongstoiñ, 5 Iaiong:
Hadien bala ioh ia ka jingtip kaba thikna halor ka jingdon jong ki briew kiba ju ai jingiarap ia ka kynhun kieng atiar na ri lum Garo kaba la tip kum ka Garo National Liberation Army (GNLA), ki pulit ka Shallang kila pynlong ia ka jingwad bniah ban lap ksai ia kitei ki briew kiba don kti ban ai jingiarap ia katei ka kynhun kieng atiar ha kiba bun ki liang.
Shuh shuh katkum ka tyllong khubor na ki heh pulit ka West Khasi Hills la ong ba ki pulit jong ka Shallang hadien ba kila suba jur ia u wei u briew u bala tip kyrteng kum u Daniel M Sangma 32 snem ka arta na ka shnong Rongkhugre kaba hap hapoh ka Shallang Police Station, mynta ka sngi ki la leit ruh ban pynlong ia ka jingkhynra ia ka iing sah jong utei u briew.
Ha katei ka jingleit khynra ki pulit ka Shallang na ka iing sah jong u tei u briew ki la ioh ruh ban kurup ia shibun ki tiar siat ba kynthup ia kawei ka pistol 7.65 mm ar tylli ki kuli AK 47 ki bym Pat bthei, 5 tylli ki shithi dawa Pisa ha ka kyrteng jong ka GNLA, kawei ka 7.65 mm pistol magazine, kawei bad kawei ka Panasonic smart phone.
Ki pulit ka Shallang kila kem noh ia u tei u briew halor ka jingdonkti ka jong u ban ai jingiarap ia katei ka seng kiengbatiar bad ruh halor ka jingiarap ban pynbuh rieh ia kitei ki tiar siat bala ioh kurup da ki pulit ha ryngkat ka jingsakhi lang ruh da ki Independent witnesses.