Talasi iing ki pulit por miet ha Nongmensong

Shillong, 14 Jylliew:
Ka seng longkmie jong ka Nongmensong kaba tip kum ka Nongmensong Women’s Welfare Association (NWWA) ka pynrem jur ia ka jingleh donbor jong ka sorkar bad ki pulit da kaba kem pathar ia ki khynnah shnong khlem daw ryngkat ka jingleit khynra bad talasi ha ki iing ki sem ha ka por miet.
Ha ka kyrwoh ba la phah da ka President ka seng ka Kong A. Nongrum bad ka General Secretary ka seng ka Kong M. Mawkhiew, ki pynpaw ba ka Seng ka dap da ka jingkyndit bad lyngngoh kaba khraw halor ka jingleh donbor bad kem pathar ki pulit ia ki khynnah shnong khlem daw ryngkat ka jingleit khynra bad talasi ha ki iing ki sem jong ki nongshong shnong ha ka por miet.
Kane ka jingleh jong ki pulit ka wanrah pynban ia ka jingtieng bad shong syier ha shnong ha thaw. Ki khun samla ka shnong ki la sheptienhg ban mih ban leit sha la ki kam ki jam, kumjuh ki kmie ki kpa ki shongsyier bad rit mynsiem namar la ki khun.
Lada kumne ka iai jia man la ka por sha ka por shaei ka shongsuk shong saiñ ha shnong ha thaw.