Takrain u heh RJD, ia u myntri ka sorkar Bihar, ba u phong tuppia, da ka muja kjat

Patna: U Tejashwi Yadav, nongialam jong ka seng RJD, hynnin ka sngi, ula takrain tyngeh ia U Mangal Pandey, myntri ka koit ka khiah ka sorkar Bihar, namar ba haba u leit sha ka hospital sorkar, ha ka jaka, ba un phong ia ka tuppia, hynrei, u leit phong pynban da ka muja kjat, kaba ki ju buh ha hospital.

Haba pyni paidbah ia katei ka dur, U Yadav, u ong “u myntri um ithuh satia ia ka jingiapher hapdeng ka muja kjat bad ka tuppia sop khlieh”.
“Ki nongtrei jong ka tnat ka koit ka khiah, ki pynsop ia ka khlieh jongu, da ka muja kjat, ha ka jaka jong ka tuppia, ha ka por ba u leit jngoh ia ka hospital. U myntri ruh um tip satia ia ka jingiapher. Kumta ki paidbah, ki la sngewthuh ia ka jinglong jingman jong ka koit ka khiah ha Bihar. U la dei une u myntri, u bym lerkam tam ha ka jylla, kat haduh mynta” ong utei u heh RJD, haba thoh ha ka X.