Takrain u CEM ia U Mukul, ba thmu pynkylla 6th schedule

Shillong, 14 ’lyngkot:
U CEM ka KHADC u Bah Adelbert Nongrum u la takrain ia u Myntri Rangbah ka jylla u Dr Mukul Sangma uba niew bein ia ka Council da kaba shu sngap man man halor ka jingthmu ban pynkylla ia ka Sixth Scheduled kaba lah ban leit rah shen ha ka Parliament.
Haba kren ia ka jingpynbun ia ki MDC ha ka Council kumba la kdew ha ka jingiateh bad ka ANVC bad ka ANVC-B, u Bah Nongrum u sngew ba ka sorkar jylla ka dei ban shim ia ka jingshaniah jong baroh ki district council kynthup ka KHADC bad ka JHADC namar ba ka jingthmu ban pynkylla ia ka 6th scheduled kan ktah lang ym tang ia ka GHADC.
“Sngewsih ba ia ka KHADC bad ka JHADC la shu ieh shadien khlem ai jingtip lang halor ka jingthmu ban pynkylla ia ka 6th scheduled. Kane ka pyni ba ka sorkar jylla kam shym la khein snep ia kine ki ar tylli ki Council”, la ong u CEM.
U la pynpaw ia ka jingsngew lyngngoh ba u Myntri Rangbah u sted bha ban khot ia ka jingialang jong baroh ki party ha ka 16 tarik Kyllalyngkot ha kaba ki district council la shah khot lang ban iakren ia ka jingdawa ban pynlong ia ka “regional council’ kaba khlem don party.
“Baroh la iatip ba kane ka jingdawa na ka bynta ka regional council la thaw da uwei u briew. U Myntri Rangbah u la khot ia ka jingialang jong baroh ki party tang ban pynhun ia uwei u briew. Kane kam dei kaba iahap namar ba ki hima ki raid ki dei ban kham halor ban ia uwei u briew. Hynrei u Myntri Rangbah u la sngew da kawei ka lynti kaba long kaba sngewsih”, la ong u Bah Nongrum.
U la buh jingkylli ia ka jingai jingmut da ka KHADC halor ka jingthmu ban pynkylla ia ka Sixth Scheduled ka ban aiti sha ka tnad kampohiing ka ri India lyngba ka sorkar jylla.
“Ka KHADC ka la dep phah ia ka jingai jingmut halor ka jingthmu ban pynkylla ia ka Sixth Schedule ka riti synshar ka ri sha ka sorkar jylla ha u snem 2013. Hynrei haduh mynta ngim thikna la ka sorkar jylla ka la dep phah ne em sha ka sorkar pdeng”, la ong u CEM ka KHADC.
U CEM u la ong ba kam long kaba kyrkieh ia ka Council ban khot jingialang ban iakren ia ka jingdawa ban thaw ia ka regional council.
“Ha nga shimet, kam long kaba kyrkieh ban khot jingialang ban iakren ia kane ka kam” u la ong.