T.9klur ka pisa nongrep, ym lah pyn treikam, thalain ka PAC    

Shillong:Ka Public Account Committee jong ka iing dorbar thawain ka jylla mynta ka sngi, ka la khot ia ki ophisar jong ka tnad rep ka riang hadien ka jingioh ia ka kaiphot jong ka Controller Auditor General ba ka tnad rep ka la thep ia ka pisa ki nongrep T.9 klur ha ki ar tylli ki bank.

Haba kren ha ki lad pathai khubor, u lamphang ka PAC, u Bah Charles Pyngrope u iathuh ba ka jingkhot ia ki ophisar jong ka tnad rep ka riang ka long hadien ka jingioh ia ka kaiphot jong ka CAG ba ka tnad rep ka la thep ia ka pisa kaba long T.9 klur tyngka ha ki ar tylli ki bank khlem pat pyndon kam ka ba dei jong u snem 2007-2014.

Na ka liang u Bah HM Shangpliang, u dkhot jong ka PAC la iathuh ba ha u snem 2007 ka sorkar pdeng ka la mang pisa T. 38 klur ia ka tnad Agriculture bad Horticulture, na kane ka sorkar pdeng ka la pyllait T.19 klur sha ka sorkar jylla, hynrei ka sorkar jylla kala pyndon kam  T.7.36 klur bad ia kaba sah ka tnad ka rep ka riang ka la pyn phai noh sha ka sorkar bad la thep ia kane ka pisa ha ar tylli ki Bank.

Kane ka pisa kaba sah mynta T.9 klur kaba khlem pat pyndon kam ka long ban ai jingiarap ia ki nongrep ban thied Power tiller, ban ai jinghikai ia ki nongrep bad ban iada na ka jingbam khniang ia ki jingthung.

U bah George B Lyngdoh u dkhot ka PAC, u la iathuh ruh ba  ka jingeh jong ki nongrep ka long ba kim ioh ia ki symbai ha ka por thung bad ha ba kin ioh ha ka por kaba biang bad kane ka ktah ia ka rep ka riang bad ki nongrep ki ia kynduh ia ka jingeh lada kim ioh ia ki symbai ha ka por ba biang.