Shillong:Ka North Eastern Hills University Teachers Association (NEHUTA), ha ka kyrwoh mynta ka sngi, ka kren shai, ba U Prof. Prabha Shankar Shukla, uba dei U Vice Chancellor, ba mynta jong katei ka University, u dei ka daw bah halor ka jyrsih kaba jubor kaba jia mynta ha katei ka University bad katei ka seng, ka ong, ba utei u dei u briew, uba ka kyrdan pule jongu, ka dang duna bha bad uba shu wan sha ka University, lyngba ka lynti sain pyrthei, kumta, ka kamram jongu, ka dei pynban, tang ban pynmih ia shibun ka huri hura ha katei ka University. Ka seng, ka ong shuh shuh, ba ka kyrdan pule lem bad ka jingtbit jongu, haba ia nujor bad kiwei pat, ha ka por ba thungkam ia u saw snem mynshwa, ka pyni shai, ba u hap ban treikam, katba kum ka jingbthah jong ka seng, kaba la pynkup bor ia u bad ka jingleh thurmur jongu, ka pynlong, ba un thung ia ki briew, ki bym bit satia ban shimti ia ka kam, kum u Registrar, ki Deputy Registrars bad ki faculty members bad kynthup ia ki nonghikai kiba la shongthait, kiba pynmih ia ka jyrsih kaba jur ha katei ka University ha kine ki sngi bad u thungkam tang na kawei ka thain, da kaba leh niewbein ia ki trai shnong na Meghalaya bad na ka thain shatei lam mihngi.
Katei ka seng, ka ong shuh shuh, ba ki don 15ngut ki nonghikai kiba tbit shibun shah ban ia u, ki la hap ban shongthait noh, na ki kam, khlem da iohlad ban kiew kam, tang namar ka jinglehsting jongu hi bad la ong ruh ba ki nonghikai, kim ju iohlad ban iakynduh ia u, namar ba ki hap ban da buh por lypa, ha ka sngi kaba u sngewmon ma u.
Ka NEHUTA, ka kam ruh ba ha ka shithi, kaba ula phah kham mynshwa, ula kynnoh ba ka jingiakhih jong ki samla pule, ka dei tang ka tamasa bad ka seng, ka ong shuh shuh, ba hadien ba ula jah rngai, la saw bnai kynthih, mynta u sdang ban kren ieid ia ki samla pule bad kumjuh ia ka University. Ka NEHUTA, ka ong shuh shuh, ba ha ka por, ba u dang shimti kam, ula kular ba un thung noh ia ki Pro Vice Chancellor ha Shillong bad Tura, hapoh 6 bnai, hynrei um shym la leh satia ia ka, tad haduh ba kan da mih ka jingiakhih jong ki samla pule, kaba jia hadien 3 snem jong ka jingtreikam jongu.
La ong shuh shuh, ba ki don bun bah ki kam pynlut phut jongu, ha kaba ula shu bret kai ia ki klur tyngka sha ka CPWD, la lai snem kynthih, khlem da buddien ia ki kam kiba la aiti sha katei ka tnat bad mynta ka la mih sa ka jingbei pisa jongu, kaba T.93klur na bynta ka Tura Campus, ha kaba ula aiti ia ka jingtrei sha ka Manipur Tribal development Corporation, Imphal, da kaba u iaid lait ia baroh ki kyndon ain bad ba u kyntait ban aiti ia katei ka kam sha ki trai shnong jong ka jylla.
Ka NEHUTA, ka pynsngew ruh ba kat haduh mynta, ka jingtohkit pyrshah jongu, ka dang sahteng, ha kaba ka kaiphod, kam pat mih satia haduh ha kine ki sngi, hynrei la kynnoh, ba ka jingiathuh paidbah jongu, ba ula shimti kam biang, ka dei tang ka buit ban ialam bakla ia kiba bun bad ka NEHUTA, ka kren kob, ba ka kloi ban iakob markhmat ha ka jingiatainia pyrshah ia U Shukla, namar ba katei ka seng, ka kren shai, ba ka jingiakren ia sngewthuh bad u, kam don jingmut shuh satia, ong ka kyrwoh na U Prof Lakhon Kma, President bad U Dr Marbhador M Khymdeit, General Secretary, jong ka NEHUTA.
Phi don ban ong eiei?