Shillong, 6 Nohprah:
Ki nongbylla jong ka thain Sohra kiba don ha ka lama jong ka Sohra Labour Union ki la phah jingthoh sha u myntri rangbah ka jylla u Dr.Mukul Sangma ban kdew ia ki mat jingdawa jong ki nongbylla sngi ha Sohra. Haba kren sha ki nongthohkhubor u President katei ka Union bah Balawanlam kupar Khongmawpat bad u General Secretary u bah Hichestone L Marshillong ki la ong ba ki la dawa na ka sorkar ba kan pynkiew noh ia ka dor bai bylla sngi jong ki kaba ki la kdew ba ki nongtrei ba la tbit ( Skilled) ka dei ban long T.900 tyngka shisngi, Semi Skilled T.700 tyngka shisngi bad Unskilled pat T.500 tyngka shisngi. Kumba ka long mynta ki ong ka bainong u misteri ( Skilled) ka long T.500 tyngka, Semi Skilled T.350 haduh T.400 tyngka bad ki Unskilled pat T.300 tyngka shisngi.
Ki la ong ba katei ka jingdawa jong ki ka dei na ka daw ba baroh ki mar bam mardih bad ki tiar ki tar ki la kiew dor lut bad kim lah shuh ban kyrshan ia ka ing ka sem jong ki naduh ka baiing, ka bai skul, ka bai bam, ka bai dud khyllung ruh ka la kiew, ka bai umphniang ruh ka la kiew bad kiwei pat ki mar. Ki la dawa ruh ba ka sorkar ka dei ban shim ia ka lad ka lynti ba ki nongai bylla ki ju pyntrei palat por kata palat ia ka 8 kynta kumba la buh ka sorkar, ki la ong ba la pyntrei ia ki naduh ka por mynstep haduh ban dad um ka bneng bad lada jia ba kim lah kumta ki shah beh kam ha ki nongai kam ia ki. Ki la dawa ruh ba ka sorkar ka dei ban pynbeit ia ka rukom siew bainong namar kum ha Sohra ki ju siew bainong ha ka sngi iewbah hynrei don ki nongaikam pat ki bym siew biang por haduh ba ki nongbylla kim don eiei shuh ban thied jingthied.
Ki la ujor ruh ia ka jingbun ki nongbylla kiba na bar jylla bad ki la kyntu ia ka sorkar ba kan peit bniah naduh ki kot ki sla namarba ha Sohra ki ong la bun da ki bar jylla kiba trei laitluid bad kane ka ktah ia ka kamai jong ki. Ki nongialam katei ka seng ki la ong ba ki khmih lynti ba ka sorkar kan pyntreikam shuwa ka dorbar tlang lym kumta kin shim ia ki lynti kiba eh kum ban kyntait thep vote ha ka elekshon.