T. 85 u synsar Pynursla, T.83 na Mawsynram rT. 35 ka sla tyrpad khlem dieng ha Iew Dielang

Shillong, 25 Jylliew:
Ka dor jong u synsar ka la  kham kiew mynta ha iew dielang ha Maw iong katba ka sla tyrpad ka don ar jait ki dor kaba bha bad kaba kham sniew.
Haba u Rupang u la ioh ban iakren ia u malik thied synsar bad sla tyrpad ha katei ka iew, u Amin der Das u la la iathuh ba ia mynta, ka dor jong u synshar ka shong la ka dor katkum na ki thain bapher bapher ka ri Khasi bad Jaintia.
“Mynta ngi thied T. 85 shi kilo u synsar na thain Pynursla namar ba u kham bha ba lyngkot ki dieng, bad duna syntiew, katba ka dor u synsar na thain Mawsynram ka kham duna bad la thied ha ka dor T. 83 shi kilo”, la ong u Das uba la ju thied synsar bad sla tyrpad la slem naduh u snem 1988 ha kane ka iew.
U Das u la iathuh ba ia ka sla tyrpad, pat la thied ha ka dor T. 35 shi kilo na ka bynta kato kaba khlem don dieng katba kito kiba don dieng la thied tang ha ka dor T. 20 shi kilo.
Katkum ka jingiathuh une u malik, u synsar ba kham bha ba ju wan poi sha kane katei ka iew dielang u dei na ka thain Jaintia Hills, Balat, bad ka thain Pynursla bad ruh na thain Ri-Bhoi.
“Mynta ym pat ioh synsar thymmai, ngi thied ia u synsar ba buh stok ki briew bad shi sngi shi sngi la ioh ban thied shi trok eiei”, la iathuh shuh u Das bad  kumjuh ruh ka sla tyrpad.
Haba kylli kaei ka daw ba jur ka jingdawa synsar ha ka ri India, u Das u la iathuh ba ka jingdawa synsar jur bha namar ba ha kiwei ki jylla jong ka ri India ym ju mih synsar lait noh tang ha Meghalaya, katto katne ki bynta ka Assam, Manipur katba sha kiwei ki jaka ym mih synsar. “Lada dei ka iing Khristan ne Hindu, ne Muslim ne, ngi donkam ban don synsar ban pynkhuid ia ka iing”, la ong u Das. Dei na kane ka daw, bym don synsar ne bym mih sha kiwei ki jaka ba ka jingdawa synsar ka jur bha na kane ka jylla, u la iathuh bad bynrap ba ha kiwei ki jylla sha ri thor, la pyrshang ban thung hynrei um mih namar ba duna um namar ba u synsar u dei jingthung ba donkam shibun ka um.
Ha kawei ka liang, u Das u la iathuh ba u soh mrit ruh u don la ki jong kid or. U sohmrit khlaw u kham rem dor shibun ia u soh mrit bam. “Mynta ka dor jong  u soh mrit khlaw ka la poi sha ka T.580 shi kilo katba u sohmrit bam la thied T. 420”, u la ong. Haba kylli kaei ka jingtip ba ka dor ka iapher hapdeng kine ki  sohmrit, u Das u la iathuh ba u sohmrit khlaw u kham rem dor namar ba ki pyndonkam ban shna dawai katba u sohmrit bam, la pyndonkam beit tang ban bam.