T.70 lak mang ka sorkar ia ka Meghalaya Games na bynta 14 jait ki jingialehkai

Shillong: U myntri ba dei khmih ia ka tnat Sports & Youth Affairs ka sorkar jylla, u Bah Banteidor Lyngdoh u la pynpaw ba ka jingthmu ha lyndet ka tnat ka jong u ban kyrshan ia ka Meghalaya State Olympic Association ban pynlong ia ka Meghalaya Games 2019-20, ka dei namar ban ioh ban plie lad ia ki khun samla ba don ka sap ha ki kam ialehkai ban pynpaw pyrthei ia ki, kaban long shi bynta ban pynkhreh ia ka National Games 2022.

U Bah Banteidor u la ong ia kane hadien ka jingialang ia pyrkhat kam jong ka Organising Committee, ba la long hynne ka sngi ha Secreteriat, ha kaba la don lang ki nongialam bad ki dkhot ka MSOA, ka Director ka tnat kong WAM Booth bad kiwei kiwei.

U la iathuh ba ia ka Meghalaya Games kaban sdang naduh ka 17 tarik mynta u bnai, la mang kumba 70 lak tyngka ban pynlut na ka bynta 14 tylli ki jait jingialehkai.
Ha kane ka kynti, ki jingialehkai kiba la thmu ban pynlong ha baroh ki 14 tylli ba kynthup ia ka archery, athletics, badminton, basketball, boxing, billiards & snooker, judo, karate, shooting, swimming, table tennis, taekwando, tennis, wushu.
Katkum ka jingong u myntri, ki nongwan iashim bynta baroh ha kine ki jingialehkai kin kynjoh sha ka 1900 ngut.
U Myntri u la ong ba ha ka jingshisha, ia kane ka lympung la thmu ban pynlong ha u bnai Nohprah jong u snem ba la dep, hynmrei na ki daw bym lah ban kiar, la kynriah noh pat ia ka sha ka taiew kaban wan jong u bnai Rymphang.
Haba jubab pat ha lor ka jingkylli, hato ka jingpynlong ia kane ka lympung kam ktah pat ia ki khun samla kiba bun namar ba kin hap ban iakhun ia ki eksamin bapher bapher ki jong ki, halor kane, u bah Banteidor u iathuh ba ka jingbuh ia ka sngi ka ia ne ia ka tarik ban pynlong ka dei kaba la shim rai da ka MSOA, hadien ba ka la dep ba kan ia syllok bad ki synjuk ialehkai.
U bah Banteidor u la kam ruh ba ka jingpynlong ia kane ka lympung ka la long biang hadien ki shiphew snem kiba la leit noh.
Ki jaka ban pynlong ia kine ki jingialehkai ki long St Anthopny’s School, JN Stadium, Polo, U Tirot Sing Indoor Stadium, Shillong Club, Nongthymamai Sports & Cultural Club, Laban Sports Club Indoor Stadium, Assam Regimental Centre, Crinoline Swimming Pool.