T.61 lak pynlut ka tnat ri jingri, ban sumar ia 3,500 ki masi, kiba la ioh kurup na khappud Bangladeh

Shillong:Katkum ki jingtip kiba u Rupang, u la ïoh lum na ka tnad Animal Husbandry & Veterinary, la lap ba ïa ki masi ba ka tnad pulit ne BSF ka ïoh ban bat noh ïa kiba la thmu ban shalan sha Bangladesh la ri la sumar da ka Society of Prevention of Cruelty to Animals (SPCA) ha kaba ki District Animal and Husbandry & Veterinary Officer ki dei ruh ki Secretary jong ka bad ki Deputy Commissioner ki long ki shongknor jong kane ka kynhun ban sumar ïa ki jingshah leh tohmet ki mrad bad ïa kane la sdang naduh u snem 2020.

Kat kum ka jingtip kaba u Ru pang, u ïoh na ka ophis ka Directorate of Animal Husbandry & Veterinary la lap ba ha ka jylla ki don dang tang ha ki lai tylli ki District ba kynthup ïa ka East Khasi Hills, West Jaintia Hills bad ka East Jaintia Hills bad la lap ruh ba naduh u snem 2019-20 haduh u snem 2021-22, ka jinglut kaba ka tnad na bynta kine ki lai tylli ki jaka sumar ïa ki mrad ka kot sha ka 61,65,988 na bynta kine ki lai snem.

Shuh shuh la lap ba ha u snem 2019-20 ka jinglut ka kot sha ka 51,80,685, ha u snem 2020-21 ka jinglut ka kot 9,03600 bad ha u snem 2021-22 pat ka poi 81,703 bad ha kine ki snem ki masi kiba kine ki jaka sumar ki ri bad sumar ka palat ïa ka 3,500 tylli.

Shuh shuh kat kum ka jingtip kaba u Rupang u ïoh la ong ba kine ki ki masi ka tnad ka ri haduh ba kin da ïap bad kiba bun na ki hi ruh ki la ïap na ka daw ba naduh ba wanrah ïa ki ruh kiba bun hi ki dei kiba ym da khlaiñ ka met.