T. 6 lak soi tuh u MDC barim ka JHADC ban thied tin sopiing, lap ka HNYF

Shillong, 10 Rymphang:
Ka HNYF Raliang circle ka la kynnoh ba u MDC barim ka JHADC u Bah KM Lytan u la soi tuh ia ki 7 ngut ki briew ban thied tin sopiing.
Ka seng ka la kynnoh ba une u MDC u la leh ia kane kam soi tuh ia ki briew kynthup ka Kong Ridakut Lamare, Rimiki Lamare, Julina Suchiang, Pearly Lytep, Dora Lamare, Hampyrwa Chen, bad u Numa Suiam. Kane ka jia ha u snem 2013-14 ban thied ia ka tin sop iing (CGI sheet) kaba la kot sha ka jinglut kaba T. 6 lak, la ong ka seng ha ka kyrwoh ba la lap da ka RTI.
Ha ka jingujor ba la phah sha u Deputy Commissioner ba la soi da u Publicity secretary ka seng u Bah Nicky Sten, ka la ong ba kine ki briew ki la ujor FIR sha ki pulit halor kane ka leh buit tuh utei u MDC, bad ki la kyrpad hakhmat u DC ban leh ia kaba donkam.
Ha kawei ka liang, ha ka FIR ba la ujor pyrshah ia u MDC barim ka 16-Shangpung, kine ki briew ki la kynnoh ba u Bah Lytan u la pyndonkam bakla ia ka kyrteng jongki ha kaba iadei bad ka skhim ban thied tin da kaba pynthoh bria ia ki kyrteng jongki kaba long pyrshah ia ka ain ne ka hok longbiew manbriew. “ngi kyrpad ba dei ban pynshitom ia une u briew katkum ka ain”, la ong kine ki hynniew ngut ha ka FIR ba la ai ha Raliang Outpost.