Shillong:U Myntri Rangbah ka jylla u Conrad K Sangma, haba jubab ia ka jingkylli ba la wanrah da u bah Mohendro Rapsang, (Congress) ; ha kaba ia dei bad ka kam dewiong, u myntri rangbah u la ong ba ka jubab kaba la ai da u myntri ka sorkar India, ia ka jingkylli No 656 hapoh Rajya Sabha ka dei halor ka jingai jingtip ka sorkar jylla.
U myntri rangbah u la iathuh ba ka sorkar jylla ka la shim ia ki lad ki lynti ban khanglad ia ka kam beain ha kaba iadei bad u dewiong bad ban pynthikna ba kan ym dei ban don ka jingtih dewiong beain ha ka jylla. U la iathuh ba ban khang lad ia ki kam beain ha kaba ia dei bad u Dewiong ka sorkar ka la pyntrei kam ia ka ain ‘Mines and Minerals (development and Regulation) Act 1957 bad katkum ka kyndon ba 21 jong kane ka ain yn register mukotduma pyrshah ia ki nongleh beain.
Haba ia dei bad kane ka sorkar ka la pynmih ia ka jingpynbna sorkar ia ki ophisar kiba lah ban knieh bad register case pyrshah ia kiba leh beain bad katkum ka kyndon 22 jong ka MMDR Act ki ophisar ki lah ban ai da ka jingthoh sha iing bishar. La iathuh ba la bthah ia ki Deputy Commissioner bad ia ki Superintendent ki Pulit ba kin leh ia kaba don kam katkum ka rai jong ka National Green Tribunal.
Haba jubab ia ka jingkylli bynrap na ka liang jong myntri rangbah u la ong, ba, katkum ki kyndon kino kino kiba shah kem haba khaii beain ia u dewiong kin ngat ha ka kuna ka ban long T.5 lak tyngka bad kin sah set patok san snem. U myntri rangbah u la iathuh ruh ba haduh mynta 250 tylli la register mukotduma bad ka jingtohkit pyrshah ia kine ka dang iaid sha khmat ban lap ia ka jingshisha baroh ia ki nongleh kam beain.
Manka sngi man ka miet iaid ki trok kit dewiong phi dang nud ban thok haduh katne phin sa ioh ia ka jubab na uba ha jrong