T.59lak duh ei ka KHADC, bym lum thikna ia ka VAT

Shillong, 18 Risaw:
Ka sorkar Jylla, lyngba ka Finance Komishon, ka la mang T.4.50klur sha ka Khasi District Council, ha U Lber, Iaiong jong u snem 2009, na ka bynta ban pyntrei ia ki skhim leit painkhana paidbah, ki jingtap nala bad ka la lap ba na katei ka T.450lak lane ka T.4.5klur, la pyllait pisa T.390lak ban pyntrei ia 672 tylli ki painkhana paidbah. Katba kum ka jingpynmih hukum jong ka Council, kitei ki skhim painkhana, ki dei ki ban pyndep hapoh ka shisnem bad ha ka jingwad jingtip jong U Comptroller & Auditor General (CAG), la pyni ba la pyndep lut ia kitei ki jingtrei ha ka jinglut kaba T.381.44lak.
Ha ka jingjurip jong ka ophis U CAG, ha U Jylliew 2015, lalap ba kadon kawei ka jaka leit bar ha Polo, kaba la trei dep ha U Risaw 2009, ka bym shym la don ba pyndonkam satia bad sa kawei ka jaka leit bar ha Mawlai Presbyterian School, Nongkwar, kaba shongdor T.1lak, la pynpra noh ha u Rymphang 2010, ban trei ia ka iing skul jong ka Sarva Shikha Abhivan.
La pyni shuh shuh ba ka Council, ka la mang pisa T.5.60lak na ka tnat Arts & Culture bad T.8.30lak na ka tnat ialehkai na ka bynta u snem 2009-10, sha ki 30ngut ki dkhot bad la mang pisa T.39,000 sha uwei U MDC na ka tnat Arts & Culture bad sa T.19,000 ba kin sam sha kito kiba dei ban ioh jingiarap. Nangta la siew T.21,500 bad T.16,500 sha ki MDC na ka tnat ialehkai, ba kin sam jingiarap sha kito kiba dei ban ioh jingiarap. La iathuh ba na ka T.92,500, la ai jingkhein, kaba biang tang uwei U MDC bad kumta ka pisa kaba long baroh T.8.11lak, ym don jingkhein satia kaba biang.
Ka kaiphod U CAG, ka lap shuh shuh ba ka KHADC, kam shym la khate satia ia ka Value Added Tax (VAT),na ka bynta ki 1,059 tylli ki jingtrei ba la pyntrei da ki kontraktor bapher bad halor katei ka jingbym lum ia kitei ki khajna bapher, ka Council, ka la duh ei ia ka pisa kaba T.59.96lak. Ym tang katta, la iathuh shuh a ka ka khajan, kaba shongdor T.49.74lak na ki nongtrei sorkar bapher bapher, kiba don ha ki 103 tylli ki tnat sorkar, ka shu sah pongding kumto haduh mynta. La iakren bad ka Council ha U Nailar 2014 bad la iathuh ba na katei ka Council, ka la ioh lum T.22.76lak bad nangta ka dang don kaba sah sa T.26.98lak haduh U Nailur 2016. Na katei ka khajna, kaba sah, ka dei ia ka tnat Director Mineral Resources, kaba pynshah T.6,48,240lak.