T.5000 shisngi, kamai ka Civil Hospital, tang ka bai slip

Shillong, 24 Jylliew:
Hadien phra snem ka dor slip jong ka Civil Hospital Shillong kaba ju long tang ar tynka (T.2) la pynkiew sha ka shi phew tyngka (T.10) bad kane ka long naduh u snem 2004-2005.
Ha ka jingiakren bad ki katto katne ki nongthoh khubor ka Joint Director ka Shillong Civil hospital ka Dr L Sawian ka la iathuh ba ka jinglum na ka jingmih na ka bai thoh slip ka leit sha ka Hospital Management Society kaba peit ia kane ka hospital.
Haba shu khein antad, ka jingmih na kane jinglum bai slip ka long kumba T. 5 hajar namar ba ka jingdon ki nongpang ba wan shim dawai ka long kumba 500 ngut ei ei ha ka shi sngi.
Ka Dr Sawian ka la iathuh ba ka jingshakri jong kane ka hospital kala kham bha ha kine ki sngi khamtam hadien ba la ioh ia ka jingiarap na ka National Rural Health Mission (NRHM) jong ka sorkar pdeng.
Ha ki snem ba mynshwa, kiba wan shah sumar bad kiba wan iasyllok doktor ha Shillong Civil Hospital ki dei khambun na jaka nongkyndong kiba kham duna ka ioh ka kot.
Hynrei kane ka jinglong ka la kylla khamtam ha kine ki khyndiat snem bad ka daw ka dei namar ba la kham biang ki tiar bad ka rukom shakri sha ki nongpang.
“Mynshuwa khambun ki nongpang ki dei na nongkyndong kiba iawan ban shah sumar hynrei mynta naduh ba la kham biang ka Hospital la bun kiba wan wat jaka sor ruh.