T.5 lak sha kiba iap aksiden, dawa ka LJP na u Modi

Shillong, 17 Jylliew:
Ka Lok Janti shakti Party (LJP), Meghalaya ka la thoh shithi sha myntri rangbah duh ka ri u Narendra Modi ba u dei ban siew bai lutksan T.5 lak tyngka sha kiba haing hasem jong kiba la iap ha ka jingjia aksiden ha Sunapur katba T.2 lak pat ka la dawa ba dei ban siew sha kiba mynsaw kiba dang don mynta hapdeng ka jingshah sumar. Ha katei ka shithi sha u Modi kaba la soi da u Dinesh Kr Gupta Chief General Secretary ka LJP, Meghalaya katei ka seng ka la pynpaw ka jingsngewlem sha ki bahaing hasem jong kiba iap bad ka kitbok kit rwiang ia kiba mynsaw ba kin ioh bor noh.
Ha kawei pat ka khubor ka BJP-WJH ka phah ia ka khubor sngewlem sha baroh kiba ha ing ha sem jong kiba la khlad bad kiba mynsaw ruh kumjuh halor kane ka jingjia. Ka BJP ka kyntu jur ia ka sorkar ba kan shimkhia halor ka rukom long jong ki surok ba la sniew hakane ka jylla ban pynbha shuh shuh ia ki khnang ban lait na kine ki jait jingjia kin jia hadien habud bad kumjuh katei ka seng ka kyntu jur ia ki bor district khamtam ki traffic police ba ki dei ban peitngor bha ia ki drabar ba niah kali ha ryngkat ka jingdih bu-aid ba ha rukom kaba ktah ia ka jingim ne jingma ia kiwei ki briew ba lui lui.