T.5 lak kular U MP ban synniang sha ka School Nonglwai

Nongstoiñ, 30 Risaw:
Ka skul Pingbah UPS Nonglwai ban nang kham ai shuh shuh ia ka jingshakri kaba janai ia ki khynnah skul ha katei ka thain, kala ialeh ruh ban nang kyntiew ia katei ka skul sa sha kawei pat ka kyrdan bad kata ka long ban kyntiew noh sha Secondary school ha kaba kala ioh ruh ban buh ia u maw nongrim jong katei ka secondary school.
Ia u tei u Maw nongrim jong katei ka skul la wan ban plied a u Ma Vincent H Pala MP ka Shillong ha ka sngi Saitjain jong ka taiew ba la lah ha ryngkat ka jingiadon lang u MLA ka thain u bah D. Jyndiang, u bah L.G. Nongsiej MDC ka Nongstoin bad kumjuh ki bor pyniaid jong katei ka skul.
U kongsan haba ai jingkren ha katei ka jingialang plie ia u maw nongrim jong katei ka skul u la ong ba ka jingnang jingstad kam myntoi lada ngim don ia ka roi ka par ha ka dong bad ka thain, namar ba kiba bun ki briew kiba la don ia ka jingnang jingstad kaba biang kin hap ban mih na la ka jong ka shnong bad ka thain ban leit wad ia ki kam ki jam jong ki shabar wat na ka Jylla bad ka Ri hi kumjuh.
Shuh shuh u la ong ruh ba ka jingnang jingstad ka iaid ryngkat ruh bad ka jingshlur la ha kino kino ki liang bad ka jingnang jingstad kam mut ruh tang ha ka pule puthi lane ha ka thoh ka tar hynrei ka kynthup lang ruh ia ka pyrkhat ka pyrdain ka roi ka par bad kiwei kiwei.
Ka jingwan jong ka roi ka par ha ki dong bad ki thain ka long kaba donkam haduh katta katta namar ba ka roi ka par ruh kadei shi bynta jong ka jingnang jingstad ong u bah Pala da kaba u la kyntu ruh ia ki paidbah jong ka thain ba kim dei ban shu ia pyrshah klumar ia ka roi ka par kaba wan sha ki dong bad ki thain.
Ha katei ka sngi kum ka dak ban iasnoh kti lang bad ka jingthmu jong katei ka skul ban nang kyntiew kyrdan na ka liang jong u ma Pala u la kular ruh ban noh synniang kumba 5 lak tyngka na ka bynta ban tei ia ka iing skul kaba thymmai.
Katba na ka liang jong u MLA/MDC ka thain kila kular ruh ban ai ka jingiatrei lang bad ka jingthmu ba bha jong katei ka skul na ka bynta ban pynurlong ia ka jingangnud jong katei ka skul.
Nalor kitei ki kynrem ki lyndan ha katei ka sngi la iadon lang ruh ki nonghikai ki khynnah skul bad kumjuh ki riew paidbah jong ka thain Nonglwai ban pynshit pynshngain ia katei ka jingialang plie ia u maw nongrim jong katei ka skul.