T.45 klur tam, thied tablet ka sorkar ha ki ar snem

Shillong, 11 Nohprah:
Ka jingsam tablet ka sorkar jylla ia ki khynnah klas XII ha kine ki ar snem ka la kot sha ka T.45,18,19,420 klur na bynta ki 50109 ngut ki khynnah skul ha baroh ki 11 tylli ki District ka jylla Meghalaya.
Katkum ka jingtip ba la ioh lyngba ka ain wad jingtip paidbah na
ophis jong ka tnad Information Technology (IT) ka jylla, la kdew ba ha
u snem 2013-14 ka sorkar ka pynlut T. 2,70,69,420 klur na bynta ban
thied ia ki 25258 tylli ki tablet bad ka la sam sha ki 25139ngut ki khynnah klas XII bad 119 tylli ki tablet kiba tam.
Ha u 2014-15 ka sorkar ka la pynlut haduh T.22,47,50,000 klur ban
thied ia ki 25000 tylli ki mobile tablet bad la sam sha ki 24970 ngut ki khyn nah pule klas XII ha baroh ki skul ha kylleng ki district ka jylla bad ka tam 30 tylli ki tablet bad la buh ban pynap lada don kano
kano ka jingduna, la ong ka jingtip ba la ioh na kane ka tnad.
Kine ki mobile Tablet ba ka sorkar ka sam sha ki khynnah skul kawei
kawei ka tablet ka shong dor T.8990 bad ia kine ki tablet la thied na ka kom peni M/s Lava International Ltd.
Kane ka kompeni ka la ai ryngkat ka kular ban shna lada siew, na ka bynta 2 snem, ia kitei ki mobile tablet.
Kine ki jaka shna ia ki tablet la buh ha baroh ki district hynrei bun ki khynnah kim tip haei kita ki jaka shna ei ba la buh bad mynta shisien ba la sniew ki la long noh tang ki mar jingialehkai.
Lah ban kdew ba u Myntri Rangbah u Mukul Sangma ha kine ki ar snem u ladep sam ia ki tablet sha man ki khynnah skul klas XII bad ia kine ki tablet la sam na ka skhim Student Digital Learning Aid Scheme (SDLAS).
Ia kane ka skhim sam m-tablet la pyntreikam da ka sorkar MUA ba la ialam u myntri rangbah u Dr Mukul Sangma mynshem snem bad ka la bteng la ar snem mynta. Katkum ka jingong u myntri rangbah ia kane ka jingsam tablet un bteng man u snem bad haba peit ia ka jinglut kam dei shuh kaba kai.